Хамгийн их ёс жаягтай, хүмүүжилтэй Япон, Солонгосын парламентын гишүүд жигтэйхэн зодолддог юм билээ. Нэг гишүүнээс “Та яагаад зодолдов” хэмээн асуухад “Өргөн барьсан хуулиа олны анхааралд оруулах гэж сөрөг хүчний гишүүдийг өдөж зодуулсан” хэмээн ярьж байлаа. Парламентын гишүүд хэлэлцэж буй асуудлаар маргах, улмаар зодолдох хэмжээнд хүрдэг ч ял шийтгэл хүлээгээд байдаггүй. Үүнийгээ үзэл бодлын зөрөлдөөн гэж тайлбарладаг юм.
Монголын парламентад олонхи болсон нам эвслүүд цөөнхөө үг хэлүүлэхгүй байх, өөрийн талд урвуулах бодлого ямагт барьсаар ирсэн. Хүч хэрэглэх, үг хэлэх эрхэнд халдсан улс төрч, улс төрийн хүчнүүд дараагийн сонгуулиар ялаглаж буйгаас үзвэл иргэд хариултаа өгч буйн илрэл юм. Манай парламентын гишүүд хууль хэлэлцэх гэж мэтгэлзэх нь битгий хэл хэрэлддэг, үг хэлэх эрхэнд халддаг. УИХ-ын дарга З.Энхболд “Надад наад үг чинь таалагдахгүй байна” гэж гишүүний үг хэлэх эрхэнд халдаад нар өөд харсангүй ээ.
УИХ-ын гишүүн Б.Пүрэвдорж “УИХ-д ард түмний боломж хулгайлсан ЖДҮ-чид парламентад ороод ирсэн тухай, зарим нэгийг нь албан тушаалаар шагнаад таалагдаагүй, фракцигүй улс төрчийг шоронд явуулж шийтгээд байгааг шүүмжлэв. Энэ шүүмжээ өндөр дуугаар хэлсэнд УИХ-ын дэд дарга Т.Аюурсайхан ихэд эгдүүцэн долоо хоног чуулганд суух эрхийг хасав. Энэ шийтгэл ч өөрөө утга учиргүй, цагаа олоогүй арга хэмжээ байлаа.
Ард түмнээс мандатаа аваад ирсэн гишүүн үг хэлэх нь дархан эрхтэй, тэртусмаа эрх баригч нарын алдааг шүүмжлэх даалгавартай. МАН-ын гишүүдэд ЖДҮ доромжлол гүтгэлэг гэж ойлгодог болсон бололтой. Б.Пүрэвдоржийг чуулганаас хөөж явуулаад юу хэлэлцэх юм бэ, ямар хулгай хийх нь вэ. Ховдын ард түмний дуу хоолойг хаагаад эхэлбэл олон нийтийн сүлжээг асуудалгүй зогсоох нь ээ. Хүчирхийллээс хүчирхийлэл төрдөг учир иргэдийн Үндсэн хуулиар олгогдсон эрхэнд халдаад байвал ард түмэн босно. Б.Лхагвасүрэн гуайн хэлсэнчлэн “Цусаар унтраах гээд барахгүй ард түмний уур хилэн дүрэлзэнэ”
