Төмөр замын газрын дарга Б.Артур тэргүүтэй төлөөлөгчид эдгээр өдрүүдэд БНХАУ-д ажиллаж, Хятадын төмөр замын байгууллагуудын төлөөллүүдтэй уулзлаа.
Энэ хүрээнд 2025 оны 11 дүгээр сарын 27-ны өдөр БНХАУ-ын Улсын төмөр замын газрын дарга Сун Шюдөтэй уулзаж, хоёр улсын төмөр замын салбарын хамтын ажиллагааны асуудлыг хэлэлцлээ.
Уулзалтын эхэнд Төмөр замын газрын дарга Б.Артур БНХАУ-ын Улсын төмөр замын газрын дарга Сун Шюдөд шинэ үүрэгт ажлаа хүлээн авч, “Хятадын төмөр замуудын корпораци” ХХК-ийн Ерөнхий захирлын хүндтэй албанаас шилжин ажиллах болсонд нь баяр хүргэлээ.
БНХАУ-ын Улсын төмөр замын газрын дарга Сун Шюдө Монгол, Хятадын төмөр замын салбарын хамтын ажиллагаа Гашуунсухайт-Ганцмод боомтын бүтээн байгуулалтын ажил эхэлснээр шинэ шатанд гарсан бөгөөд үүнийг Монгол Улсын төмөр замын салбарын төлөөлөгчдийн Хятадын төмөр замын дохиолол холбоо, хөдлөх бүрэлдэхүүн, барилга угсралтын салбарын төлөөллүүдтэй хийсэн ажил хэрэгч уулзалтууд нотолж байгааг онцоллоо.
Талууд уулзалтаар Гашуунсухайт-Ганцмодын хил дамнасан төмөр замын барилга угсралтын явц, Замын-Үүд-Эрээн боомтын 1435 мм царигтай 2 дахь зам болон Шивээхүрэн-Сэхээ, Ханги-Мандал боомтын хил дамнасан төмөр замын бүтээн байгуулалт, 1955 оны “Монгол-Хятадын хилийн төмөр замын хэлэлцээр”-ийг шинэчлэх асуудлаар дэлгэрэнгүй санал солилцож, эдгээр ажлуудыг төмөр замын байгууллагуудын түвшинд идэвхтэй хамтран ажиллаж, тууштай урагшлуулахаа илэрхийллээ.
Мөн төмөр замын хөдлөх бүрэлдэхүүний паркийг нэмэгдүүлэх, төмөр замын хил дамнасан тээвэр зохион байгуулалтыг сайжруулах, хилийн нэвтрүүлэх хүчин чадлыг ахиулах зэрэг асуудлаар хамтран ажиллах боломжуудыг хэлэлцлээ.
Энэхүү уулзалтын мөрөөр хоёр талын ажлын хэсгийн төлөөллүүд 2025 оны 11 дүгээр сарын 28-ны өдөр цахимаар хуралдаж, “Замын-Үүд-Эрээн боомтын 1435 мм царигтай 2 дахь замыг хамтран барих тухай Монгол Улсын Засгийн газар, БНХАУ-ын Засгийн газар хоорондын хэлэлцээр”-ийн төслийг тохиролцож, хамтарсан протокол байгуулав.
