Монгол Улсын Зам, тээврийн яам, Сангийн яам, БНСУ-ын Олон улсын хамтын ажиллагааны байгууллага /КОЙКА/ хооронд 2021 онд байгуулсан хэлэлцээрийн протоколын дагуу хэрэгжүүлж байгаа “Галт тэрэгний хөдөлгөөн зохицуулах нэгдсэн төвийн барилгыг барих, үйл ажиллагааны чадавхыг бэхжүүлэх замаар Монгол Улсын төмөр замын тээврийн өрсөлдөх чадварыг сайжруулах” төслийн хүрээнд төмөр замын салбарын мэргэжилтнүүдийг чадавхжуулах 5 дахь удаагийн сургалтын нээлтийн үйл ажиллагааг 2025 оны 10 дугаар сарын 20-ны өдөр Төмөр замын их сургуульд зохион байгууллаа.
Нээлтийн арга хэмжээг БНСУ-аас Монгол Улсад суугаа Онц бөгөөд Бүрэн эрхт Элчин сайд эрхэмсэг ноён Чой Жин Вон, Монгол Улсын Засгийн газрын хэрэгжүүлэгч агентлаг Төмөр замын газрын дарга Б.Артур нар нээж, талууд улс орны нийгэм, эдийн засгийн хөгжлийн гол судас болсон төмөр замын салбарын хамтын ажиллагааг улам гүнзгийрүүлж, Монгол-Солонгосын найрсаг харилцаа, хамтын ажиллагааг зузаатгаж байгаад баяртай байгаагаа илэрхийллээ.
Төслийн хүрээнд 5 дахь удаагаа зохион байгуулагдаж байгаа энэ удаагийн сургалт нь Монгол Улсад болж байгаагаараа онцлогтой бөгөөд багц сургалт нь өнөөдрөөс эхэлж 2025 оны 12 дугаар сарын 12-ны өдөр хүртэл 8 долоон хоногийн турш үргэлжилнэ. Сургалтад Монгол Улсын төрийн болон төрийн өмчийн оролцоотой, мөн хувийн хэвшлийн төмөр замын тээврийн байгууллагуудын 105 албан хаагчийг хамруулахаар төлөвлөсөн бөгөөд БНСУ-ын дадлага, туршлагатай багш, профессорууд төмөр замын дохиолол холбоо, галт тэрэгний хөдөлгөөн зохион байгуулалт, мэдээлэл технологийн хэрэглээ зэрэг сэдвүүдийн хүрээнд өөрсдийн туршлагаас хуваалцаж, танхимын сургалтаар онолын мэдлэгийг олгох юм.
Арга хэмжээнд төслийн санхүүжүүлэгч БНСУ-ын Олон улсын хамтын ажиллагааны байгууллага /КОЙКА/-ын Монгол дахь Суурин төлөөлөгч хатагтай Жу Хэйн Нан, төслийг хамтран хэрэгжүүлж буй Солонгосын төмөр замын корпорац /Корэйл/, Солонгосын үндэсний төмөр замын байгууллага /КНР/, Ёошин инженеринг ХХК-ийн хүндэт зочид төлөөлөгчид болон Монгол Улсын төмөр замын салбарын байгууллагуудын төлөөллүүд оролцлоо.
