Энэ удаагийн “ХЭН ЮУ ХЭЛЭВ” буланд УИХ-ын дарга Д.Амарбаясгалан, Тэргүүн шадар сайд Л.Гантөмөр, Эрчим хүчний сайд Б.Чойжилсүрэн нарын үгийг онцолж байна.
УИХ-ын дарга Д.АМАРБАЯСГАЛАН: Би анхааруулаад хэлчихье. Чуулганы хуралдаанд албан ёсны хариулт өгөх хүмүүс нь байхгүй бол хэлэлцэж байгаа асуудлыг нь хойшлуулна шүү. Шинээр эмхлэн байгуулагдсан парламентын УИХ-ын намрын анхдугаар чуулган эхэлж байна. Ийм байхад бид хариуцлагатай, илүү няхуур байх хэрэгтэй.
АН-ын дарга, Тэргүүн Шадар сайд Л.ГАНТӨМӨР: Эрдэнэбүрэнгийн цахилгаан станцыг барина, зээл авна гээд шийдчихсэн юм билээ. Одоо үүнийг хийхгүй гээд яах юм. Хятадын Засгийн газраас авахгүй гэх юм уу. Нэг тэрбум ам.доллароор газрын тос боловсруулах үйлдвэр барина гээд Энэтхэгийн Засгийн газартай тохирчихсон. Тэрийгээ одоо авахгүй гэх юм уу. Тохироод, шийдвэр гарчихсан зээлүүдийг л өнөөдөр ярьж байгаа. Шинээр авах зээл бол гарна.
Эрчим хүчний сайд Б.ЧОЙЖИЛСҮРЭН: Эрчим хүчний салбарт нэг хүндрэл байгаа нь ахуйн хэрэглээ давамгайлдаг. Өвлийн улиралд оройн 17:00-22:00 цагийн хооронд хэрэглээ огцом нэмэгддэг. Урьд нь манай улс ОХУ-аас тохируулгын функцийг хэрэглэж 220 кВт-ын хос шугамаар цахилгаан эрчим хүч импортолдог байсан. Одоо бол энэ шугамын чадлын хэмжээ дээд хязгаартаа тулсан. Оросын талаар 345 мВт, Дархан дээр ирээд 310 мВт болоод энэ хоёр шугамаар импортлох чадлын хэмжээ дээд хязгаартаа тулаад байна.
