Нийслэлийн Онцгой комиссоос өнөөдөр /2024.06.25/ цаг үеийн асуудлаар мэдээлэл хийлээ.
Улаанбаатар хотод өнгөрсөн долоо хоногт хоёр хоног үргэлжилсэн бороо орсон. Энэ борооны улмаас Туул голын үерийн аюултай түвшин 260 см-342 см болж, нийт 82 см-ээр давж үерлэсэн. Түүхэндээ нийслэлд ингэж үерлэсэн тохиолдол байхгүй. Жишээлбэл, 1966 оны үерээр 310 см хүрч, үерийн аюултай түвшинг давж байсан бол өнгөрсөн жил 311 см хүрсэн гэдгийг албаныхан мэдээлж байна. Өнөөдрийн байдлаар голын түвшин 267 см болж татарлаа. Нийт 211 удаагийн дуудлага мэдээллийн дагуу Онцгой байдлын болон мэргэжлийн байгууллагын 1118 албан хаагч, 121 автомашинтайгаар шуурхай ажилласан. Хүн гэмтэж, амь насаа алдаагүй гэв.
Онцгой байдлын алба хаагчид Ням гаригаас эхлэн Хан-Уул дүүргийн Биокомбинатад ажиллаж, голын салаанд байгаа айл өрх, амралтын газрыг нүүлгэн шилжүүлж ажиллалаа. Үерийн аюултай түвшин буураагүй байхад иргэд гэр орон руугаа орох саналыг ихээр өгч байна.
Нийслэлийн Засаг дарга Сэлбэ, Дунд гол дагуух аж ахуйн нэгжүүдтэй уулзаж, бургас мод, лаг шаврыг цэвэрлэхээр шийдсэн. Улаанбаатар хотод дөрвөн удаагийн том хэмжээний үер болж багагүй бэлтгэл хангасан. Хөрөнгө мөнгийг төсөвлөсөн. Энэ ажлын үр дүнд энэ удаагийн үерээр айхтар эрсдэл гарсангүй гэдгийг онцоллоо.
Хотын менежер Ц.Төрхүү:
-Сэлбэ голын инженерийн байгууламж дотор байгаа бургас, лагийг зөөж байна. Энэ ажлыг нэгдүгээр сарын 5-наас эхлэн хийж байгаа. Нийслэлд 1966 оноос хойш Сэлбэ гол дагуух даланг байгуулсан. Нийт 24 км даланг байгуулж, гар хийцлэлээр хийсэн. Бид энэ жил 1.5 км төмөр бетонон хийцтэй болгохоор ажиллаж байна. Иргэдийн зүгээс гол дагуух бургасыг тайрч сүйтгэж байна гэж шүүмжилдэг. Ер нь инженерийн байгууламж буюу далан дотор мод бут сөөг байх ёсгүй. Хууль журамдаа ч тэгж заасан байдаг. Нийт 30 дүгнэлт гарч, шинжлэх ухааны үндсэн дээр энэ ажлыг хийж байгаа. Бургас мод усны урсацыг удаашруулж, далангаа сэтэлж урсах нөхцөл байдал үүсгэдэг гэв.
Геодези, усны барилга байгууламжийн газраас өнгөрсөн дөрвөн жилд 33 томоохон байршилд авто замын борооны ус зайлуулах шугам сүлжээг хийсэн. Үерийн барилга байгууламж гэвэл 1.2 километрийг шинээр барьсан.
Ойролцоогоор 4.5 км хэсгийг засварласан. Өнгөрсөн жил 4.3 км үерийн даланг сэргээн засварласан. Мөн нийт 68 мянган тонн лаг шаврыг зөөж цэвэрлэхээр төлөвлөснөөс 30 орчим мянган тонн лаг шаврыг зөөвөрлөөд байна. Бид энэ жил 12 ус зайлуулах шугам сүлжээ барихаас төлөвлөснөөс одоо зургааг нь барьж дуусгасан. Үлдсэнийг нь улсын баярын өмнө ашиглалтад оруулна. Улаанбаатарт 1253 км авто зам байдгаас 250 км нь ус зайлуулах шугам сүлжээтэй байдаг. Би энэ ажлыг үе шаттай хийж байгаа гэдгийг албаныхан мэдээллээ.
