БНХАУ-ын Ухань хотоос ирсэн Монгол оюутнууд өдгөө ХӨСҮТ-д тусгаарлагдаад байгаа. Тэднийг энэ сарын 1-нд тусгай үүргийн онгоцоор Ухань хотоос авчирч, шинжилгээ аван, улмаар 7-14 хоног тусгаарлана гэсэн юм. Эхний шинжилгээний хариу сөрөг гарсан бөгөөд өнөө маргаашгүй давтан шинжилгээнд оруулаад сөрөг гарвал ирэх бямба гаригаас эмнэлгээс гаргана гэдгээ ХӨСҮТ-ийн дарга мэдэгдсэн юм.
Харин тэднийг тусгаарлагдаж байх хугацаанд Уханиас ирсэн оюутнууд ХӨСҮТ-д байхгүй, эсвэл Уханиас ирсэн оюутнууд эмнэлгээс гарах гэж эмч нарыг барьж идэх гэж байна гэх зэрэг мэдээллүүд сошиал орчинд гарсан. Энэ асуудалд Ухань хотоос ирсэн оюутнуудын нэг болох А.Золбоо өөрийн фэйсбүүк хуудсаар тайлбар өглөө. Тэрбээр “Сайн байцгаана уу.
Ухань хотоос ирсэн 31 оюутны төлөөлөл байна.
Бид ХӨСҮТ-д эмч нарынхаа хяналтан дор тусгаарлагдсан хэвээр байна.
Бидний нэр төрд зориудаар халдан, үндэслэлгүй гүтгэн доромжилсон энэ иргэний талаар маргааш өглөө өмгөөлөгчөөрөө дамжуулан албан ёсоор Цагдаагийн байгуулагад гомдол гарган шалгуулах болно.
Бидний биеийн байдал хэвийн бөгөөд энэ бүх тусгаарлалтын хугацаанд бидний төлөө сэтгэл гарган ажилласан сайхан сэтгэлт эмч, сувилагч, асрагч, ариутгагч нартаа хэрхэн баярласан талархсанаа илэрхийлэх тухай өөр хоорондоо ярилцаж байгаагаас өөр гомдол саналтай хүн алга.
Тиймээс та бүхэн энэ мэт хуурамч мэдээлэл түгээж олон нийтээс хандалт авах гэсэн этгээдүүдийн хуурамч мэдээлэлд итгэхгүй байхыг хүсье.
Ятгах тусам нягтал!!!
Цагдаагийн Ерөнхий Газрын Хэвлэл Мэдээллийн Төв
Цахим гэмт хэрэгтэй тэмцэх алба” гэжээ.