МУИС-ийн 80 жилийн ойн баярын хурал болж байна. Энэ үеэр БШУ-ны сайд Л.Энх-Амгалан мэдээлэл өгөв.
Тэрбээр “Өнөөдөр Монгол Улсад орчин цагийн дээд боловсролын тогтолцоо үүссэний 80 жилийн ой болж байна. МУИС 80 жилийн түүхэнд бичиж үлдээсэн байна.
Монголын үндэсний их сургууль гэж нэртэй байсныг 1992 оны Ардын их хурлын тогтоолоор Монгол Улсын их сургууль гэж нэрлэсэн. Тэгэхээр МҮИС гэж нэр бол МУИС-ийн оюуны өмч.
Тиймээс хэн нэгэн этгээдийн хууль бус үйлдлээр МҮИС гэж нэр өмчлөгдөж, ашиглагдаж болохгүй. Энэ бол гэмт хэрэг. Тиймээс МҮИС гэдэг нэр МУИС-д хадгалагдаж үллдэх ёстой гэдэг шийдвэр гаргасан. Оюуны өмчийн маргаанд ялсан” гэлээ.
Мөн тэрээр хэлэхдээ:
МУИС-ИЙН ҮЕ ҮЕИЙН ЭРДЭМТЭН БАГШ, АЖИЛТНУУД, СУРГУУЛИАРАА ОВОГЛОДОГ ОЮУТАН ЗАЛУУС, 100,000 ГАРУЙ ТӨГСӨГЧИДӨДӨӨ ТҮҮХТ 80 ЖИЛИЙН ОЙН БАЯРЫН МЭНДИЙГ ӨРГӨН ДЭВШҮҮЛЬЕ.
Үндэсний дээд боловсрол, орчин цагийн шинжлэх ухааны тогтолцооны суурийг тавьсан ууган их сургуулийнхаа 80 жилийн түүхт ой тохиож буй энэ сайхан өдрийн халуун мэндийг хүргэж, амжилт бүтээлийн дээдийг хүсэн ерөөе!
Тэртээ 1942 оны энэ өдөр МУИС-ийг нээх ёслолыг Ленин клубт хийж байсан бол 80 жилийн дараа бид төрийнхөө ордонд ууган их сургуулийнхаа түүхт ойн өдрийн баярын хурлыг хийлээ.
МУИС нь Эдийн засгийн чөлөөт зах зээлийн нийгэмд шилжсэн 1990 оноос хойш Олон улсын дээд боловсролын хөгжлийн жишгээр бакалавр, магистр, докторын шаталсан сургалтыг нэвтрүүлж, 100 гаруй мянган их сургуулийн боловсролтой Үндэсний шилдэг боловсон хүчин, мэргэжилтнүүдийг бэлтгэж, улс орныхоо хөгжилд үнэтэй хувь нэмэр оруулсан юм.
Өнөөдөр дэлхий дахинаа боловсрол, тэр тусмаа дээд боловсрол олон янзын сорилтуудтай тулгарч байна. Тийм ч учраас олон улсын байгууллагууд, дэлхийн тэргүүлэх их сургуулиуд дээд боловсролын ирээдүйн асуудалд онцгой анхаарч эхэллээ.
Өнгөрсөн онд ЮНЕСКО-оос гаргасан “Ирээдүйгээ хамтдаа төсөөлөхүй” тайлан нь боловсролын салбарын ирээдүйн дүр төрхийг томьёолсныг НҮБ-ын Ерөнхий нарийн бичгийн дарга Антонио Гуттериш дэмжиж, “Хувьсаж буй боловсрол” дээд түвшний уулзалтыг энэ 9 сарын 19 -нд зохион байгуулсан.
Энэхүү дээд хэмжээний уулзалтын үзэл санаа нь боловсрол түүний дотор дээд боловсролын хөгжлийн ойрын ирээдүйн зорилгыг тодорхойлж өгсөн юм. Нөгөө талаас өнөөдөр цахим шилжилтийг боловсролын салбарт хийх явдал бол сонголт бус хэрэгцээ болж, их сургуулийн үйл ажиллагааны төвд оюутан байх философи дээд боловсролын хөгжлийн зүг чигийг зааж өгч байна.
Өнөөдөр дэлхийн тэргүүлэх их сургуулиуд эрэмбэрээрээ өрсөлдөх биш өөрсдийн бүтээж буй мэдлэгээрээ, даацтай судалгаагаараа, шинэ инновациараа, дэлхий дахины болон улс орныхоо өмнө тулгамдсан асуудлыг шийдэх шийдлээрээ их сургуулийнхаа үнэ цэнийг нэмдэг болсон гэдгийг онцлон тэмдэглэхийг хүсэж байна.
МУИС-ийн хөгжлийн стратегийг Монгол улсын хөгжлийн концепцийг урт хугацаандаа хэрэгжүүлэх суурь нөхцөл болгож харах нь чухал байна.
Тухайлбал:
Нэг. Эдийн засгийн тусгаар тогтнолын баталгаа болох, дэлхийд үнэлэгдэх ур чадвар бүхий хүний нөөцийг бий болгох,
Хоёр. Дэлхийн түвшний Суурь шинжлэх ухаан буюу байгаль, нийгэм, хүмүүнлэгийн ухааны салбаруудыг тууштай хөгжүүлэх,
Гурав. Бидэнд тулгарч буй сорилт, бэрхшээлийг даван туулах инженер, технологи, хэрэглээний судалгааны шинэ чиглэлүүдийг бодлогоор дэмжих хэрэгцээ шаардлага үүсэж байна.
Дөрөв. МИУС-ын ирээдүй хөгжил эрдэмтэн багш та бүгдээс хамаарах бөгөөд багшийг чадавхжуулах асуудлыг хамгаас чухалчилах учиртай. Их сургуулийн багш бол өндөр түвшний судалгаа хийх чадварыг эзэмшсэн судлаач, судалгааны үр дүндээ тулгуурлаж ахисан түвшний сургалт явуулдаг эрдэмтэн багш байх ёстой,
Тав. Сургалт, судалгааны болон салбар дундын хамтын ажиллагаа чухал бөгөөд үүнийг дэмжсэн механизмыг бий болгох шаардлагатай байна.
Зургаа. Монгол улсын ирээдүй болсон оюутан залуусыг төлөвшүүлэх, соён гэгээрүүлэх орчин цагийн жишиг их сургууль байх ёстой.
Иймд МУИС нь судалгаанд суурилсан их сургуулийг бий болгон хөгжүүлэхэд бусад их, дээд сургуулиудтай хамтрах, хүчээ нэгтгэх зайлшгүй шаардлагатай. Манай Төрийн өмчийн 6 их сургуулийн хамтарч хүчээ нэгтгэж байж бид хөгжлийн цогц асуудлыг шийдэх болно.
Монгол Улсын Засгийн газраас хэрэгжүүлж буй дээд боловсролын эрх зүйн шинэчлэлийг хэрэгжүүлэх, боловсролын цахим шилжилтийг гүнзгийрүүлэх, Төрийн өмчийн их сургуулиудын хамтын ажиллагааг хөгжүүлэх, Монгол Улсын хөгжлийн тэргүүлэх чиглэлд нийцүүлж, нэгдсэн стратегийг боловсруулан хэрэгжүүлэх,
Хөдөлмөрийн зах зээлд нийцсэн дэлхийн хөгжлийн жишигт тэмүүлсэн дээд боловсролыг хөгжүүлэх, Судалгааны их сургуулиудын тогтолцоог бий болгож хөгжүүлэх, Дээд боловсролын өрсөлдөх чадварыг нэмэгдүүлэх, Их сургуулиудын засаглалыг оновчтой болгох зэрэг бодлого, үйл ажиллагаанд МУИС бусад сургуулиудаа манлайлан түүчээлэх учиртай. Үүнд МУИС-ын эрдэмтэн багш, ажилтан, оюутан суралцагчид, төгсгөчид та бүхэн чухал үүрэг гүйцэтгэнэ гэдэгт итгэлтэй байна.
Монгол Улсын тэргүүлэх, ууган их сургуулийн хамт олонд энэхүү эрхэм нэрээ ямагт хадгалан дуурсгаж явахын өлзийтэй ерөөлийг өргөн дэвшүүлье! МУИС хэмээх эрдмийн их өргөөнөөс гэрэлтсэн хөгжлийн түүчээлэгчид маш олон болтугай.
