Автобусанд ээжийнхээ өвөр дээр сууж явсан 6 настан “Ээж ээ, маргаашнаас эхлээд талх идэхгүй ээ. Гурилны үнэ нэмэгдчиж. Бас талхных ч гэсэн. Бүгдээрээ гурилаа аваад мантуу хийж идье. Тэгэхгүй бол аав та хоёр ядарна. Тэгээд ч аавын бие муу байгаа юм чинь…” гэх нь цаанаа л нэг гунигтай. Ээжийнх нь нүдэнд нулимс цийлэгнэснээ “Том, том юм яриад л миний хүү чинь сургууль ороод, том агаа болоод юм ойлгодог болчхож” гээд хүүгээ үнсэхдээ цийлэгнэсэн нулимсаа эгшээж амжив.
Хүү ээждээ “Бид 4-ийн мөнгөөр ахиухан гурил авчих. Мантуу хийж чадахгүй болвол гурилаа хуураад арвайн гурил шиг болгож байгаад идье, тийм ээ. Доржаа ах төмсөө хурааж ирээд манайд шуудай төмс өгнө гэсэн. Тэрийг нь бүгдээрээ тахианы толгойтой, бас үхрийн толгойны зурагтай шөлөнд чанаж идэж бас болно тийм ээ…
Ээжээ, усыг нь ахиухан хийчхээр давс нь таардаг гэсэн. Бүгдээрээ 2 сар л тэсчихвэл аав ч гэсэн явдаг болчихно, тийм ээ, ээжээ… Одоо би та хоёроос гоё юм авч идье гэж нэхэхгүй за…” гэж ээжийгаа аргадсан аястай шулганах аж…
Хүүгийн яриаг сонссон нэгэн нулимсаа арчсанаа төд удалгүй 20 мянган төгрөг хүүд өгөх гэхэд буруу харчхав. Ээжийнх нь санаа нь зовсон бололтой “Эгчээ, зүгээрээ, баярлалаа. Аав нь саяхан хагалгаанд ороод… манайхан… жаахан… сэтгэл санаа тавгүй байгаа юм…” гэв.
Автобусанд хүмүүс амьсгалахаа ч байсан мэт чив чимээгүй байдлыг эвдэж нөгөө эмээ “Настай хүн юм өгч байхад авдаг юм миний хүү. За май, ав ав…” гэхэд ээж рүүгээ харснаа аваад “Баярлалаа эмээ, та урт насларай, эрүүл байгаарай…” гэснээ хүүхэд л юм хойно “Манай аав ядаж энэ эмээ шиг явдаг болчихвол, тээ ээж ээ…” гэв. Автобус дүүрэн хүмүүс нэр хийтэл инээлдсэнээр талх, гурилын яриа түр ч болов замхарч хүүхдийн гэнэ цагаан ярианд жаахан ч сэтгэл сэтгэл нь засрав бололтой хүмүүсийн нүүрэнд инээмсэглэл тодорч, хүүгийн ярианаас үүдсэн гурил талхны үнийн тухай хүүрнэл ч тэгсхийгээд намжив.
Сургуулийн босго дөнгөж алхсан хүү хүртэл хүртэл өнөөгийн энэ амьдралд сэтгэл чилээж бяцхан зүрхэндээ амьдралаа дэнсэлж буй нь энэ.
Товчхондоо бол тоолж барамгүй шахам малтай, хэмжиж үл чадах баялгаараа дэлхийд тэргүүлэх хэмжээний улс маань ГУРАВХАН сая хүнээ хүүхэд, хөгшидгүй зовоож буй дүр зураг энэ.
erennews.mn
