Лос-Анжелес хотноо өчигдөр болсон Оскарын шагнал гардуулах ёслолын үеэр жүжигчин Уилл Смит эхнэрээ өмөөрөн Крис Рокийг алгадсан явдал дэлхий нийтийн гол сэдэв болов.
Жүжигчин Крис Рок шилдэг баримтат киноны шагнал гардуулахаар тайзнаа гарч ирэх үедээ Уилл Смитийн эхнэр Жада Пинкетт-Смитийг “G.I Jane” киноны гол дүртэй зүйрлэн хошигносон юм. /G.I.Jane кинонд Деми Мур үсээ хусдаг хэсэг гардаг/ Үүнийг тэвчилгүй Уилл Смит тайзнаа гарч Крис Рокийг алгадан “Миний эхнэрийн нэрийг … амаараа хэлэхгүй байхыг хүсье” хэмээн орилсон.
Нийгмийн сүлжээнд хүмүүсийн санал хуваагдав. Нэг хэсэг нь Уилл Смитийг үс халзрах өвчнөөр шаналж буй эхнэрээ өмөөрч чадсан гэж үзэж байгаа бол, нөгөө хэсэг нь түүнийг сая сая үзэгчийн нүдэн дээр ийм үйлдэл гаргах ёсгүй байсан гэжээ. Гэвч энэ явдлын дараа Крис Рок Уилл Смитийн эсрэг гомдол гаргаагүй байна. Лос-Анжелесийн цагдаагийн газраас “Энэ үйл явдалд холбогдсон этгээд цагдаад гомдол гаргахаас татгалзсан. Хэрвээ гомдол гаргавал Лос-Анжелесийн цагдаа мөрдлөг явуулна” гэсэн байна.
Крис Рок нэг бус удаа Уилл Смитийн эхнэрээр доог тохуу хийжээ. 2016 оны Оскарын шагнал гардуулах ёслолын үеэр Крис Рок хөтлөгчөөр ажилласан байна. Тухайн үед тун цөөн тооны африк-америк гаралтай жүжигчдийг нэр дэвшүүлсэн нь хар арьст жүжигчдийн дургүйцлийг хүргэж, #OscarsSoWhite буюу цагаан арьстнуудын Оскар болж байна хэмээн африк-америк гаралтай уран бүтээлчид шагнал гардуулах ёслолыг бойкотолж, оролцохоос татгалзсан юм. Тухайлбал, хар арьст нэг ч уран бүтээлч гол шагналуудад нэр дэвшээгүйг эсэргүүцэн Уилл Смит, эхнэр Жада Пинкетт Смитийн хамт Оскарын ёслолд оролцоогүй аж. Энэ “боломжийг” Крис Рок алдалгүй, хошигноод амжжээ. Гэтэл энэ нь өнгөт арьст жүжигчдийн тэмцлээр доог тохуу хийж байна хэмээн олон хүний дургүйцлийг хүргэсэн байна.
Крис Рок “Жада Оскарыг бойкотолно гэнэ үү? Би Рианнагийн дотуур өмдийг бойкотолдог шиг Жада Оскар бойкотолно гэнэ ээ.” гэжээ
Крис Рок “Энэ жил юу болоо вэ?” Хүмүүс галзуурчихаа юу? Спайк Ли /найруулагч/ гарзуурчихаж. Жада галзуурч. Уилл бас галзуурчээ. Бүгд л солиорсон байна. Жада ирэхгүй гэсэн. Жада Оскарыг бойкотолно гэнэ үү? Би Рианнагийн дотуур өмдийг бойкотолдог шиг Жада Оскар бойкотолно гэнэ ээ. Танай хүн, Уилл нэр дэвшээгүйг ойлгож байна…” гэх мэтчилэн хэлжээ.
Хожим Уилл, Жада Смит нар Крисийн доог тохуунд ямар нэг тайлбар хэлээгүй ч, тэд томоохон арга хэмжээнд оролцохоороо хоорондоо үг дуугардаггүй, бие биеэсээ зай барьдаг тухай Холливүүдэд ярьдаг байна.
2018 онд Крис мөн л Уилл Смитийн өмнөх амьдралын талаар дайжигнаад амжжээ. Уилл өмнөх эхнэр Шери Зампиногийн төрсөн өдрөөр зургийг нь тавиад “Төрсөн өдрийн мэнд хүргэе! @shereezampino. #BestBabyMamaEver! 🙂 Хайртай шүү, Ри Ри” хэмээн бичээд Шери болон хүү Трейн нарын зургийг нийтэлжээ. Харин доор нь Крис Рок “Хөөх. Эхнэр чинь чамайг их сайн ойлгодог байх аа” хэмээн бичсэн нь нийгмийн сүлжээгээр хурдацтай тархсан байна.
Өчигдөр болсон Оскарын наадмын завсарлагааны үеэр Уилл Смитийг жүжигчин Дензел Вашингтон болон Брэдли Купер нар тайвшруулж ярилцжээ. Гэвч Америкийн кино академийн зүгээс Уилл Смитийн үйлдлийг буруушааж, “ямар ч хүчирхийллийг бид өршөөхгүй” хэмээн мэдэгдсэн. Гэхдээ одоогоор Уилл Смитэд ямар нэг шийтгэл оногдуулах эсэх нь тодорхойгүй байгаа юм.
Эх сурвалж: CNN
