Дэлхий нийт Оросын шатахуунаас хэр их хамааралтай вэ?
АНУ, Их Британи ОХУ-аас импортолдог шатахуунаа хязгаарлана гэдгээ мэдэгдсэн. Үүний хариуд Москва Европт нийлүүлдэг байгалийн хийгээ зогсооно хэмээн сүрдүүлэв.
АНУ ОХУ-ын эсрэг авсан эдийн засгийн хоригийг улам тэлэхийг холбоотнуудадаа уриалсан юм. Тэд хойд хөршөөс шатахуун, байгалийн хий, нүүрс худалдан авахгүй гэв.
Харин Их Британи энэ оныг дуустал шатахууны худалдаагаа үе шаттай бууруулна. Европын холбоо байгалийн хийн худалдаагаа 2/3-оор бууруулна. Энэ хооронд тэд өөр хувилбарууд олно гэж тооцоолжээ.
ОХУ-ын Ерөнхий сайдын туслах Александр Новак “Оросын шатахуунаас татгалзсанаар дэлхийн зах зээлийг хүнд байдалд оруулна” гэсэн юм. Үнэхээр ч шатахуун, байгалийн хийн үнэ өслөө. ОХУ нийлүүлэлтээ зогсоовол үнэ дахин өснө. Мөн түүхий эдийн үнэд нөлөөлөх нь гарцаагүй.
ОХУ ЯМАР ХЭМЖЭЭНИЙ ШАТАХУУН ЭКСПОРТОЛДОГ ВЭ?
Тус улс АНУ, Саудын Арабын дараа буюу дэлхийн гурав дахь том нийлүүлэгч. ОХУ өдөр бүр 5 сая баррель түүхий тос худалддаг бөгөөд үүний талыг Европ худалдан авдаг.
2020 оны байдлаар Их Британитай харьцуулахад АНУ Оросын шатахуунаас бага хамааралтай, тэд нийт шатахууныхаа 3 хувийг Оросоос авдаг бол Их Британид энэ үзүүлэлт 8 хувь байна.
АНУ Венесуэлийн эсрэг авсан эдийн засгийн хоригуудаа зөөллөх боломжтой.
Тэгвэл шатахууныг юугаар орлуулах вэ? Эрчим хүчний мэргэжилтнүүд байгалийн хийтэй харьцуулахад шатахууныг өөр зүйлээр орлуулах нь амархан гэж үзэж байна. Жишээ нь АНУ Саудын Арабаас шатахуун худалдаж авах хүсэлтээ илэрхийлжээ.
Саудын Араб ОПЕК-ийн гишүүн улс. ОПЕК-ийн гишүүд дэлхийн нийт газрын тосны 60 хувийг нийлүүлдэг. Иймд тэд газрын тосны үнэ тогтооход чухал үүрэгтэй.
ОХУ ОПЕК-ийн гишүүн биш хэдий ч 2017 оноос хойш тус нэгдэлтэй хамтран ажиллаж байна. Тэд үнээ буулгахгүйн тулд олборлолтоо өсгөхгүй байх магадлалтай.
Мөн АНУ Венесуэлийн эсрэг авсан эдийн засгийн хоригуудаа зөөллөх боломжтой. Нэг үе Америкийн томоохон ханган нийлүүлэгч байсан Венесуэл одоо ихэнх газрын тосоо БНХАУ-д худалдаж байна.
Орос Европт байгалийн хий нийлүүлэхгүй бол юу болох вэ?
Угаас Европын орнуудад байгалийн хийн үнэ сүүлийн саруудад ихээхэн өссөн. Үнэ дахин өсөх эрсдэлтэй. Энэ оны эхнээс АНУ-д байгалийн хийн үнэ 37, Их Британид 142, Европын холбооны улсуудад 144 хувиар тус тус өссөн.
ОХУ Европын байгалийн хийн 40 хувийг нийлүүлдэг. Тэд хийн хоолойгоо хаавал Итали, ХБНГУ хүнд байдалд орно.
Энэ нөхцөлд Европчууд Катар, Алжир, Нигер рүү хандах боломжтой. Гэвч эдгээр улсууд нийлүүлэлтийг шуурхай нэмэхэд хүндрэл үүснэ. Иймд шингэрүүлсэн хий импортлох саналыг мэргэжилтнүүд тавьж байна. Бас нэг хувилбар нь сэргээгдэх эрчим хүч.
Гэвч үүнд ч цаг хугацаа шаардлагатай. Иймд Итали, Герман гэх мэт оросын байгалийн хийнээс хамааралтай улсууд нүүрсэн цахилгаан станцуудыг судалж эхэлжээ.
Эх сурвалж: BBC
