Mongol HD телевизийн бэлтгэн хүргэдэг “The Voice of Mongolia” шоуны шилдэг оролцогч Д.Бямбасүрэнтэй уншигч та бүхнийг уулзуулъя.
Тэрбээр эхний шатандаа үзүүлсэн гайхалтай үзүүлбэрээр тайзыг доргиож, дөрвөн шүүгчийг эргүүлж, Д.Отгонбаяр шүүгчийг сонгосон.
Тэгвэл түүний үзүүлбэр “The Voice шоу”-ны өнгөрсөн долоо хоногийн шилдэг үзүүлбэрийн гуравдугаарт бичигджээ.
-Сар шинэдээ сайхан шинэлсэн үү?
-Сайхан шинэлсэн, танай хамт олон бас сайхан шинэлсэн үү? Усан бар жилдээ эрүүл энх, өвчин зовлонгүй аз жаргалаар дүүрэн байгаарай гэж Монголын бүх хүмүүстээ зориулан хүсч байна.
-Д.Бямбасүрэнгийн үзүүлбэр “The Voice” шоуны өнгөрсөн долоо хоногийн шилдэг үзүүлбэрээр шалгарсан байна. Баяр хүргэе. Энэ мэдээг сонсох мөчид хэрхэн хүлээж авсан бэ?
-Маш их баярлалаа. Шинийн дөрөвний орой гэртээ амарч байхдаа Войсын өнгөрсөн долоо хоногийн Best performance үзэж байсан чинь миний үзүүлбэр гуравт орсон байсаныг хараад шууд л эмоцио гаргасан.
Манай гэрийхэн “Хүүш ээ яачихав аа” гээд орилоод л босоод ирсэн. Гэр бүлийнхэн маш их баярласан, зүүд шиг л аз жаргалтай байлаа.
-Дуу хөгжим таны амьдралд хэр чухал вэ? Яагаад хөгжим гэж?
-Машин бензингүй бол явдаггүй шиг, дуу хөгжим миний амьдралд салшгүй холбоотой. Учир нь аав маань дуу хөжгмийн багш, ах маань морин хуурч , эгч маань ёочин хөгжмийн багш. Хүүхэд байхаасаа л дуу хуур, хөгжим цангинасан орчинд өсөж хүмүүжсэн дээ.
Дунд сургууль, их сургууль, амьдралын гараа гээд бүхий л цаг мөчид дуу хөгжим миний эд эс шиг байсаар ирсэн. Тиймдээ ч дуу хөгжим, тэр дундаа хип хоп урсгалд илүү дурлаж войс шоунд орсон. Энэ хөгжмийн урсгалд дурласан болохоор ч тэр үү одоо хүртэл ганц бие яваа. / инээв /
-“The Voice of Mongolia” шоунд ороход хамгийн их нөлөөлсөн хүн хэн бэ?
-Хамгийн их нөлөөлсөн хүн гэвэл би өөрийгөө гэж хэлнэ. Учир нь урлагт маш их хайртай, сонирхолтой, бас дэлхийн войс шоуны үнэнч үзэгч учраас өөртөө зорилго тавиад яг энэ шоунд орох ёстой гэж бодсон. Тиймдээ л хүслээ биелүүлээд шоуныхаа дараагийн шатандаа бэлдээд явж байна. Гэр бүлийнхэн маань маш их дэмжсэн, ажлын хамт олон маань ажлын цагийг минь зохицуулж, маш их дэмжсэн.
-Дөрвөн шүүгч эргэж харахад юу бодогддог юм байна. Сандарч байв уу?
-Эхлээд хоёр шүүгчийн сандал эргэх чимээ сонсогдоход бүр тайвшраад,үзэгчдээ доргиогоод өгье гэсэн бодол тархинд орж ирсэн. Сандрал бол бага байсан шүү. Үнэхээр зүүдэнд ч оромгүй явдал гэж байдаг шиг бүр алмайрмаар, дуулж байх явцад дөрвөн шүүгч маань эргэж харсан болохоор миний дуу хоолойгоор гарсан юм болов уу гэж бодсон.
-Тайз доргиосон гайхалтай үзүүлбэр байсан. Тэр их эрч хүч хаанаас нь ундраад байна?
-Би өөрөө айлын бага. Дээрээ хоёр эгч, нэг ахтай. Хайран дунд өссөн гэр бүлийнхээ эрхийн балай, шар шувуу гэж хэлдэг байсан. Гуниглаж, гутарч байх дургүй, эерэг бүхнийг хүн болгонд түгээхийг хүсдэг дээ.
-Анхнаасаа Д.Отгонбаяр шүүгчийг сонгоно гэж бодож шоунд ирсэн гэсэн. Яагаад Д.Отгонбаяр шүүгч гэж?
-Хамгийн түрүүнд би войс шоунд орох юмсан гэж хүсэж, тэндээс мөрөөдөл эхэлж байсан. Эхний шат буюу Blind audition шатандаа үзүүлбэрээ үзүүлэхэд Д.Отгонбаяр шүүгчийг эргэж хараасай гэж хүсч байсан.
Алдартай “Хурд” хамтлагийн гитарчин, ая зохиогч хүн шүү дээ. Өөрөө ч их зөв хүн, ярилцлагуудаас үзэхэд хувь хүн талаасаа маш зөв хүн шиг санагдсан. Өмнөх войсыг үзэж байхад Д.Отгонбаяр шүүгчийн оролцогчдын үзүүлбэр маш гайхалтай, шилдэг байж чадсан учраас түүний багт орохыг хүссэн.
-Танай багийн тухайд олон чадварлаг уран бүтээлчид, дуучдаар багаа тэллээ. Багийнхаа талаар уншигчдад танилцуулаач…
-Энэ жил Д.Отгонбаяр шүүгчийн баг “Дайчид” гэсэн нэртэй байгаа. Энэ олон дайчид дээр олон хүчирхэг дуу хоолой нэмэгдсээр байгаад баяртай байна. Манай баг одоогоор 12 дайчидтай болсон. Долоо хоногийн бүтэн сайн өдөр бүрийг ямар нэгэн баярт үйл явдал шиг догдолж хүлээдэг болоод байгаа. Бүх дайчдадаа амжилт хүсье, мөн бусад гурван шүүгчийнхээ багт амжилт хүсье.
-Ажлынхаа талаар манай уншигчдад танилцуулна уу. Цагдаагийн дэд ахлагч Д.Бямбасүрэнгийн хувьд ажлын өдөр хэрхэн эхэлж, хэрхэн өнгөрч байна вэ?
-Би Цагдаагийн Ерөнхий Газрын дэргэдэх “Сүлд” чуулгад ажилладаг. Манай чуулга нь Монголын нийт цагдаагийн бие бүрэлдэхүүн, дотоодын цэргийн алба хаагчдыг соён гэгээрүүлэх чиг үүрэгтэй. Тиймдээ ч хөгжимчид, бүжигчид, дуучид, захиргааны алба гэсэн дөрвөн хэсгээс бүрддэг. Би цохивор хөгжимчин мэргэжилтэй, дэд ахлагч цолтой.
Манай байгууллага урлагийн байгууллага дундаа цолтой гэдгээрээ онцлог. Өглөө бүр 05:30 цагт босоод өглөөний цай хоолоо бэлдээд, фитнесдээ явдаг. Ажил дээрээ ирж өглөө болгон раборт танилцуулдаг. Хөгжимчид гараа халаана, бүжигчид биеэ халаана, дуучид хоолойгоо халааж, гаам уншиж нийллэг сургуулилт маань эхэлдэг дээ.
Урлагийн байгууллага учраас өдрийн цагт өөрсдийгөө хөгжүүлэх цаг гардаг. Энэ цагтаа би дуугаа сонсож, райм бичих сонирхолтой. Манай хөгжмийн бүрэлдэхүүн нь шинээр жааз төрлөөр сургуулилт бэлтгэл хийж байгаа.
-Цагдаа эмэгтэй хүнхий хувьд хүнд мэргэжил шиг санагддаг. Яагаад энэ мэргэжлийг сонгосон бэ?
-Би СУИС-ийг хөгжимчин мэргэжлээр төгссөн. Удаагүй нэг жилийн дараа хилийн цэргийн байгууллагад бүтгүүлэх гээд очтол амарч таарсан. Ээж бид хоёр гэр рүүгээ буцаад алхаж байхад “Цагдаагийн Сүлд чуулга” гэсэн нэр нүдэнд харагдсан.
Анх ямар ч мэдээлэлгүй, шууд орж уулзаад “Би Монголын содон уран бүтээлч болох хүсэлтэй, танай байгууллагад орохыг хүсэж байна” гээд ярилцлага өгч байлаа. Ингээд “Цагдаагийн сүлд чуулга”-д ажилд орсон. Удалгүй цагдаагийн мэргэжил олгох 45 хоногийн сургалтанд сурч цагдаагийн дэд ахлагч, цохивор хөгжимчин болсон, үүгээрээ маш их бахархдаг. Цагдаагийн “Сүлд” чуулгын хамт олондоо маш их баярлалаа гэж хэлмээр байна.
-Цаашдаа ямар зорилго тээж байна вэ? Урлагтаа зорьсон зорилго бий юү?
-Мэдээж урлагтаа маш том зорилго тавьсан. Монголынхоо урлагийн салбарт танигдсан олон сайхан фентэй, хөгжмөө өөрөө тоглож олон талаар хөрвөх чадвартай реппер болохыг хүсдэг. Монголынхоо нэрийг дэлхийд дуурсгаж гадаадын шоу контентэд орох хүсэлтэй байдаг даа.
-Нөгөө талаар хувь хүнийхээ хувьд хүсэл мөрөөдлөөсөө хуваалцаач?
-Аав,ээж ах эгч дүү нартайгаа элэг бүтэн аз жаргалаар дүүрэн сайхан амьдарч мөн гадаад хэлээ улам сайжруулах үүднээс гадагшаа явж суралцах хүсэлтэй.
-Таныг дараагийн шатанд ахин үзэгчдийг гайхшруулсан уран бүтээлээр харахыг хүсч байна. Дараагийн шатанд нь амжилт хүсье.
-Маш их баярлалаа. Дараагийн шат үзэгчдийг суудлаас өндийлгөсөн, оролцогчдын шандсыг сорьсон хүнд шат. Миний өрсөлдөх хүн хэн байгаа бол гэдгийг үнэхээр тааварлашгүй байна. Түгшиж, догдолж байна.
Т.Мөнхжаргал
Эх сурвалж: 24tsag.mn
