ХӨСҮТ-ийн Ерөнхий захирал Ц.Билэгтсайхан: Сүүлийн 109 нислэгээр 10 мянган иргэд ирснээс халдварын 232 тохиолдол зөөвөрлөгдөж ирсэн. Тэдний 104 нь хилийн нэвтрэх цэгийн шинжилгээгээр, үлдсэн 128 нь гэрийн болон тусгаарлан ажиглах байранд авсан давтан шинжилгээгээр илэрсэн. Нийт гаднын 21 улсаас зөөвөрлөгдөн ирсэн ба эдгээрээс хамгийн их нь Турк Улсаас 102 тохиолдол зөөвөрлөгджээ.
Мөн нийт 3492 хүн тусгаарлан ажиглах байранд шинжилгээнд хамрагдсанаас 112 тохиолдлыг илрүүлсэн. Алтанбулаг боомтоор 2100 хүнээс зургаан тохиолдол, Цагаан нуур боомтоор ирсэн 510 хүнээс дөрвөн тохиолдол, Боршоо боомтоор 213 хүнээс 0, Гашуунсухайтаар ирсэн 4751 хүнээс 64 тохиолдол тус тус батлагдсан. Сүүлийн 40 хоногийн хугацаанд 537 тохиолдол зөөвөрлөгдөн иржээ.
Омикрон хувилбар 10 энхийг сахиулагч, Истанбул-УБ болон Бангкок-Улаанбаатар нислэгээр ирсэн хоёр тохиолдолд илэрсэн
Нийт 12 сорьцод омикрон хувилбар батлагдсан ба үүн дотроо энхийг сахиулагч 10, Истанбул-УБ чиглэлийн нислэгээр ирсэн нэг тохиолдол, Бангкок-Улаанбаатар нислэгээр ирсэн нэг тохиолдол багтаж байна. НЖС-ээр баталгаажуулах энэхүү шинжилгээг түүвэрлэж буюу олон сорьцоос түүж цөөн тоогоор хийдэг. Мөн гаднаас зөөвөрлөгдөн ирсэн болон сэжигтэй тохиолдлуудад дараагийн шинжилгээг хийж байна.
НЖС шинжилгээний технологи нь олон үе шаттай ба 7-10 хоног шаарддаг. Лабораторийн хариу гарч ирсний дараа биоинферматикийн програм ашиглаж боловсруулдаг ба генүүдийг нэг бүрчлэн угсардаг. Дараа нь ялангуяа S ген дээр байгаа 30 гаруй мутацуудыг тодорхойлдог учир багагүй цаг хугацаа ордог. Мөн бид өнгөрсөн оны 10-12-р сард авсан 100 гаруй сорьцыг шинжлүүлэхээр Япон Улс руу илгээгээд байна.
2021 оны 12-р сарын 19-нд 244 энхийг сахиулагч ирснээс 231-ийнх нь хариу эерэг гарсан ба 14 хоног тусгаарлан эмчилж гаргасан. Тэдний 96 хувийнх нь биеийн байдал хөнгөн байсан.
Одоогоор батлагдаад буй 12 омикрон хувилбарын шинжилгээг ХӨСҮТ-ийн лабораторид хийсэн ба Япон руу баталгаажуулахаар явуулсан 100 сорьцын хариу хараахан ирээгүй байна.
Олон нийтийн дунд шинэ төрлийн вирус тархсан эсэхийг танддаг ба 12-р сард авсан ихэнх сорьцод дельта вирусний хувилбар илүүтэй байсан. Харин энэ сарын 3-ны байдлаар SK алдагдалтай буюу сэжигтэй сорьцууд бүртгэгдсэнийг шинжилж байна.
