Эмгэнэл
МОНГОЛ УЛСЫН ӨСӨХ ИДЭР, ӨРНӨН ДЭЛГЭРЭХ, УЛАМ НЭМЭХ НАЧИН ЭРДЭНЭБИЛЭГИЙН ЭНХБАТ /1984-2021/
Монгол улсын хүчит начин Эрдэнэбилэгийн Энхбат зуурдаар таалал төгсөж Булганхангай нутгийн ард иргэд бидэнд нөхөж баршгүй гарз тохиолоо.
Тэрбээр Булган аймгийн Могод суманд 1984 онд төрсөн, хулгана жилтэй бөгөөд бага балчир наснаас бөхийн спортыг сонирхон хичээллэж, 2005 онд төрөлх Булган аймгийнхаа баяр наадамд түрүүлсэн нь түүний амжилтын гараа байв.
Улмаар 2009 оны улсын их баяр наадамд тав даван шөвгөрч “Улсын начин” цол хүртсэн бөгөөд үүнээс хойш 2012, 2013, 2019 оны баяр наадмуудад дахин гурван удаа, нийт дөрвөн удаа төрийн их баяр наадамдаа шөвгөрсөн өсөх идэр, өрнөн дэлгэрэх, улам нэмэх чимэгтэй манлай начин, алдартай бөх байлаа.
Мөн тэрээр улсынхаа их баяр наадамд таван удаа дөрөв давж шөвгийн даваанд хүч сорьсон, заал танхимын томоохон барилдаанд олон удаа түрүүлж, үзүүрлэсэн шилдэг начин билээ. Түүнчлэн самбо, жүдо бөхийн шигшээ багт шалгаран, улс, тив дэлхийн тэмцээнд амжилттай оролцсон олон улсын хэмжээний мастер цолтой шилдэг тамирчин байсан юм. Талийгаачийн гэгээн дүр төрх, даруу төлөв зан чанар нутгийн зон олонд үүрд дурсагдах болно. Талийгаачийн гэр бүл, үр хүүхдүүд, аав ээж, ахан дүүс, төрөл төрөгсдөд гүн эмгэнэл илэрхийлье.
МОНГОЛ УЛСЫН ИХ ХУРЛЫН ГИШҮҮН,
БУЛГАН АЙМГИЙН НУТГИЙН ЗӨВЛӨЛИЙН
ТЭРГҮҮН Ц.АНАНДБАЗАР