Жилийн жилд наадмын концертыг хэн найруулах вэ гэсэн нууцхан өрсөлдөөн явагддаг. “On and off” продакшны Ононбат, бүжиг дэглээч Сэвжидийн Сүхбаатар, найруулагч Ганхуяг найруулж, Ганхуяг найруулагч “Дахиж энэ хэл амтай ажлыг хийхгүй” гэж ам шүд алдсан.
Мөн УДЭТ-ын Ерөнхий найруулагч Төрийн соёрхолт Н.Наранбаатар хэд хэдэн удаа найруулах завшаан тохиосон байдаг. Харин 2012 онд Ардчилсан нам ялснаар 2013, 2014 оны наадмын нээлтийн ганцыг Со гавьяат найруулж, зарим нь Со гавьяатгүй юм алга боллоо гэж ундууцсан удаатай. Төр засагт солигдон өөрчлөгдөж, МАН ялснаар Со гавьяат наадмын концертыг найруулахаа больсон. Өнгөрсөн 2020 оны наадмыг “Херо” Баатар найруулсан билээ.
Монголын топ шоумэн “Буян”-гийн Жаргалсайхан. Тэрээр Филипп Киркоров тэргүүтэй дэлхийн олон хамтлаг дуучдыг Монголд авчран тоглуулсан, мөн “Хөх тэнгэр” хамтлагийн продюсер байсан хүн. Тэрээр наадмын нээлт биш юм аа гэхэд хаалтын том шоу хийхээр төлөвлөж саналаа гаргасан ч бүтээгүй. Тэрээр Америкийн дуучин жүжигчин Женнифер Лопесийг сая долларын үнэтэй авчирч дуулуулахаар ярьсан нь илэрч, хүмүүсийн талархал, дургүйцлийг зэрэг төрүүлсэн. Тэр төслийг 2015 онд хэрэгжүүлэхээр зорьсон юм.
Гэтэл монголчууд “Том бөгстэй хүүхнийг наадмын нээлт хаалтаар авчран дуулуулж бөхийн дэвжээ гутаах нь, манайд түүнээс том бөгстэй хүүхнүүд зөндөө бий” гэж зарим нь хадуурч, зарим нь “Женнифер Лопес ирж дуулбал Монголын том сурталчилгаа болно. Визгүй болсон юм чинь Оросын холбооны улсын олон иргэд ирнэ, тэр тусмаа шинэ оросын шинэ баячууд нь ирээд мөнгөөр бороо оруулна. Женнифер Лопес нэгэнт нэгэнт Азид ирж дуулж байгаа юм чинь Япон, солонгос, сингапур, хятадаас хүмүүс ирж үзнэ.
Манай эдийн засагт нэмэртэй” гэж хөөрцгөөсөн. Хашир нэг нь эдийн засаг хүнд байгаа үед гаднаас нэг дуучин хүүхэн сая доллароор авчирч дуулуулах хэрэг байна уу хэмээн эргэлзэж байлаа. Харин “Буян”-гийн Жаргалсайхан тас гэдийж “Энэ монголчуудаа соёлжуулж, гадны том одыг одыг авчирч шоу тоглолт үзүүлье гэхээр талх боов, ааруул ээзгий идье. Тэр дэлхийн хэмжээний од ирэх ч яамай гээд дэмий балай юм яриад байх. Тэгсэн мөртлөө алиа хошин шогоо үзээд амаа цууртал инээгээд, зохиолын дуучдын аав ээжийгээ санаад хатлаа, нутгийнхаа уул нурууг үзлээ харлаа гэдэг дууг улиг болсон дууг мөнгөө төлөөд сонсоод байдаг. Ямар ч гэсэн Женнифер Лопесыг авчрахдаа авчирна” гэж байсан ч бүтээгүй нь одоо тодорхой болжээ.
“Буян”-гийн Жаргалсайхан Женнифер Лопесыг авчрах сургаар дуучин М.Нара “Үндэсний их баяр наадмаар Жей Ло-г урьж дуулуулах гэж байгаа нь үнэн юм уу? Тийм бол сайхан л юм. Гэхдээ үндэснийхээ баяраар гадаадын дуучин авчирч ард иргэдийнхээ татварыг дэмий зүйлд өндөр өртөг төлж байхаар мань мэтийгээ дуулуулчих л даа, дутахгүй л дуулж бүжиглэнэ л гэнэ шүү… Үнэ хөлс хэрэггүй ээ, үндэснийхээ баяр наадмаар ард түмэндээ уран бүтээлээрээ уулзах нь харин ч сайхан хэрэг болно.
Тэр их мөнгөө нэн даруй хэрэгтэй байгаа ядуу өрх, олон хүүхэдтэй өрх толгойлсон эмэгтэйчүүд, өндөр төлбөр шаардлагатай байгаа нялх балчир хүүхдүүддээ зориулчих би үнэгүй дуулъя” гэсэн санал гаргаж аль ч үгүй болсон түүхтэй. Филипп Киркоров, Алла Пугачевагаас эхлээд DJ Bobo тэргүүтэй оддыг авчирч байсан “Буян”-гийн Жагаа Женнифер Лопесийг авчирч дуулуулж чадах байсан нь тодорхой болоод, тэгж том ам гаргаж байсан байх аа.