Сүүлийн 10 орчим жилийн хугацаанд эзгүй байсан албан өргөөндөө Япон улсын ерөнхий сайд удахгүй нүүж орох гэж байгааг хэвлэлүүд мэдээлжээ.
Яг тодорхой хугацаа хэлээгүй ч NHK сувгийн мэдээлснээр ерөнхий сайд Фумио Кишида тун удахгүй 1929 онд анх баригдсан 5,183 м.кв талбайтай албан ёсны өргөөндөө нүүж орох гэнэ. Уг барилгыг сэргээн засварлах ажил 2005 онд дуусахад муу ёрын сүнсийг зайлуулах Шинто шашны зан үйл хийж байжээ.
Хоёр сарын өмнө ерөнхий сайдаар томилогдсон Кишида энэ өргөөнд амьдарснаар яаралтай тохиолдолд албан тасалгаандаа богино хугацаанд хүрч очих боломжтой болох юм байна. Одоо тэрбээр парламентын гишүүдийн амьдардаг байранд амьдарч байгаа юм. Ерөнхий сайдын албан ёсны өргөөнд хамгийн сүүлд тухайн үеийн засгийн газрын тэргүүн Ёшихико Нода амьдарч байгаад 2012 онд гарсан юм байна.
Кишидагаас өмнөх хоёр ерөнхий сайд уг өргөөнд нүүж орохоос зайлсхийж байжээ. Тухайлбал өмнөх ерөнхий сайд Ёшихиде Сүга парламентын гишүүдийн байрнаас ажилдаа очдог байв. Түүний өмнө ерөнхий сайд Шинзо Абэ нийслэл Токиогийн Шибуяа дүүрэг дэх хувийн байрандаа амьдарч, ажилдаа автомашинаар ирдэг байжээ.
Ерөнхий сайдын өргөө эзэнгүй байхдаа ч жил бүр 160 сая иений ($1.4 сая) урсгал зардал төсвөөс гаргаж байдаг юм. Тиймээс түүнийг ашиглаж эхлэх шаардлагатай байгаа. Гэхдээ үе үеийн ерөнхий сайд нар уг өргөөнд амьдрах тийм ч дуртай байгаагүй нь учиртай. Шинзо Абэгийн хувьд 2006-2007 онд анх удаа ерөнхий сайдаар ажиллахдаа 10 сар орчим хугацаанд дээрх өргөөнд амьдарч байжээ. Харин 2012 онд хоёр дахь удаагаа ерөнхий сайд болохдоо дахин энэ өргөөнд нүүж ороогүй юм.
Ерөнхий сайдын өргөөг 1923 оны Токиогийн газар хөдлөлтийн дараа Империал зочид буудлын загварыг хуулбарлан босгож байжээ. Америкийн архитектор Фрэнк Ллойд Райтын загвараар босгосон Империал зочид буудлын нээлтийн өдөр олон арван мянган хүний амь үрэгдсэн газар хөдлөлт давхцаж байв. Гэхдээ зочид буудлын барилга нуралгүй үлдсэн байна. Өргөөнд хамгийн анх 1932 онд нүүж орсон ерөнхий сайд Цуёоши Инүкай засгийн газрын эсрэг бослого гаргасан тэнгисийн цэргийн залуу офицеруудын гарт алагдаж байжээ.
Үүнээс дөрвөн жилийн дараа цэргийнхэн дахин бослого гаргахад тухайн үеийн ерөнхий сайд Кэйсуке Окада хувцасны шүүгээнд нуугдаж, амьд үлдсэн юм. Тэр үед ерөнхий сайдын өргөөнд таван хүн буудуулж алагдсан бол өргөөний үүдний хэсэгт бууны сумны нүх үлдсэн нь одоо ч байдаг гэнэ.
Дэлхийн Хоёрдугаар дайны дараа олон жилийн турш уг барилгад ямар ч засвар шинэчлэлт хийгээгүй тул хуучны баргар төрхөө хадгалсаар байжээ. Ерөнхий сайд асан Ёширо Мори уг өргөөнд амьдарч байхдаа сүнс харсан тухайгаа Шинзо Абэд ярьсныг Санкей сонин нэг удаа мэдээлж байв.
Өргөөний уужим саруул танхимыг гадаадын хүндтэй зочдын хүлээн авалтад ашиглах үеэр ч таагүй зүйлс тохиолдож байжээ. Тухайлбал 1992 онд болсон хүлээн авалтын үеэр АНУ-ын ерөнхийлөгч Жорж Х.У. Бушийн бие гэнэт муудаж, ерөнхий сайд Киичи Мияазавагийн өвөр дээр бөөлжиж байсан гэдэг. Японы засгийн газар бараг 100 жилийн настай энэхүү түүхэн барилгыг шинэчлэн засварлаж, хүн амьдрахад таатай орчныг бүрдүүлэхийн тулд нийтдээ 8.6 тэрбум иен ($75.8 сая) зарцуулжээ.
Эх сурвалж: Bloomberg
