Ямар ч баялаг бүтээдэггүй, өвөг дээдсийн үлдээсэн баялаг, түмний хөлснөөс шимэгчилж амьдардагаа манай төр мартчихсан. Ард түмнээ ядууруулж, тэднээс бүх боломж, эрх мэдлийг нь булааж авчихаад түүнээсээ чимхээр хүртээхдээ доромжилж, тохуурхана.
Сургалтын төлбөрийг нь чөлөөлөхийн төлөө энэ хүүхдийг амьдралын боломж таарууг нь орон даяар зарлаж, бүр гэмт хэрэг хийсэн хүн шиг байцаан шийтгэж, айлган сүрдүүлж ч байх шиг. Эцэст нь шийдвэрээ хүүхдээр өөрөөр нь уншуулан янцаглаж суух нь идэх хулганаараа тоглож буй цатгалан муурыг санагдуулна.
Тэтгэлэгийн энэ мөнгө ингэхэд хэний мөнгө билээ?
Хэний мөнгийг хэнд өгснийхөө төлөө өөрсдийгөө гавьяатан мэт эндүүрнэ вэ? Ганц хүүхдэд тэтгэлэг өгөхийн төлөө хэдэн хүн, ямар их зардал гаргаж, жүжиглэнэ вэ? Тэр зардал нь энэ хүүхдийн сургалтын төлбөрөөс ч давна шүү.
Төр, ард түмэн хоёрын байр нь солигдсон гажуудлыг ганц энэ кадраас харж болно. Уг нь эсрэгээрээ байх ёстой юм.
Төр бол ард түмний ҮЙЛЧЛЭГЧ. Өөр юу ч биш.
Б.Отгон
