“Ковид 19” бидний амьдралын салшгүй нэг хэсэг болж, хүн төрөлхтөнтэй зэрэгцэн оршихыг ДЭМБ-аас эхлээд дэлхийн бүх улс орны эрдэмтэн судлаачид анхааруулж буй. Зарим судлаач, ДЭМБ-аас “Ковид 19” бүрэн намжих болоогүй, дэгдэлт багадаа таван жил үргэлжилнэ гэдгээ илэрхийлсэн. Дэлхийн дахинд хэрэглэж буй коронавирусийн эсрэг вакцин нь цаашдаа хэдэн ч нэмэлт тун гарч ирэхийг үгүйсгэхгүй.
Монгол Улс дэлхийн улс орнуудтай харьцуулахад коронавируст халдварын эсрэг вакцинжуулалтыг эрт эхлүүлж, хүн амынхаа 60-аас дээш хувийг вакцины бүрэн тунд хамруулсан дэлхийн цөөн улсын нэг. Гэвч дархлаажуулалт өргөн хүрээг хамрахтай зэрэгцэн халдвар эрчтэй тархсан хэвээр.
Ер нь бол Монгол Улс өнгөрсөн хугацаанд гурван янзын стратегитай явж ирсэн шиг харагддаг. Эхэндээ Монголд арай ч ороод ирчихгүй байх гэсэн найдвар дээр. Халдвар алдсны дараа арай ч бүх аймаг сумандаа алдчихгүй байх гэсэн итгэл дээр. Одоо буюу гуравдугаарт вакцинаар дарах горьдлого дээр. Тийм ч учраас Засгийн газар, УОК-оос вакцинд уриалах бүртээ “Ковид 19” ор мөргүй алга болчих юм шиг ханджээ.
Жишээ 1: КОВИДГҮЙ зуны төлөө
Анх Ерөнхий сайд Л.Оюун-Эрдэнэ дөрөвдүгээр сард “Ковидгүй зун” уриалгыг дэвшүүлж, вакцины хамрагдалтыг эрчимжүүлж байв. Уриалахдаа, “Хатуу хөл хорихгүйгээр халдвар хамгааллын дэглэмээ ягштал барьж, иргэн бүр вакцинжуулалтад хамрагдах нь эдийн засгаа сэргээх цогц төлөвлөгөө хэрэгжих суурь нөхцөлийг бүрдүүлнэ. Дархлаажуулалтдаа идэвхтэй хамрагдаж, ковидгүй зуныг хамтдаа угтацгаая” гэсэн юм.
Иргэд вакциндаа идэвхтэй хамрагдсан ч халдварын тохиолдол буурахгүй, өдөр бүр шинэ тохиолдол, нас баралт нэмэгдэж байсан юм. Хүмүүсийн дунд “Ковидгүй зун” биш “Зунгүй ковид” болчихлоо гэх хошигнол ч байв.
Жишээ 2: III тундаа хамрагдаж, шинэ жилээ хамтдаа тэмдэглэе
Дараа нь есдүгээр сард “Ковидгүй зун” уриалга “Ковидгүй шинэ жил” болов. Ингэхдээ, Засгийн газар, УОК цаашид аль болох хөл хорио тогтоохгүй байх бодлого барихаа мэдэгдсэн. “Ковид 19” халдварын эсрэг дархлаа сэргээх III тунгаа оны өмнө хийлгэж шинэ жилээ хамтдаа тэмдэглэе гэсэн. Одоогийн байдлаар 465 мянган хүн III тундаа хамрагдаад байна.
Зорилтод иргэдийнхээ 30 хувийг гуравдугаар тунд хамруулснаар тохиолдлын тоо 80 хувь буурна гэж үзэж байгаа. Анх вакцинжуулалт эхэлж байхад ч, мөн л зорилтот бүлгийн 60 хувиа хоёр тунгаар вакцинжуулбал сүргийн дархлаа тогтоод энгийн амьдралдаа орсон анхны улс болоно гэж ярьж бичүүлж байв. Тэрэндээ итгээд нэг хэсэг вакцинжуулалтаад дэлхийд уралдаж, Изралийн өмнө хойно ороод л, Монгол Улс хаахна явааг Ерөнхий сайд өөрөө зарладаг байсныг санаж байгаа байх.
Жишээ 3: IV тунгаа хийлгэж, КОВИДГҮЙ Цагаан сараа тэмдэглэе
Ковидын эсрэг дээрх монгол стратегийг харвал ковидгүй зун уриалгыг дөрөвдүгээр сард гаргаж, долдугаар сарын 1-нд биелнэ гэж үзэж байж. Дараагийн ковидгүй шинэ жил уриалгыг есдүгээр сард гаргаж, арванхоёрдугаар сард шинэ жилээ өргөн дэлгэр тэмдэглэнэ гэж үзжээ. Ер нь зорьж буй хугацаанаасаа гурван сарын өмнө л хэлээд байж. Тэгвэл ирэх оны эхээр IV тунгаа хийлгэж Цагаан сараа, ахиад ковидгүй наадмаа хийе гэж уриалах бололтой. Учир нь Монгол Улс өнөөдрийн байдлаар нэг сая хүнд ногдох халдварын тоогоор дэлхийд тэргүүлж, нас баралт ч өндөр хувьтай яваа. Нэг талаар энэ их улстөржилт, эрх ашгаа л харсан хамгаалсан, эзэнгүй мэт урсгал дунд вакцинаас өөр найдах стратеги ч алга!
Эх сурвалж: itoim.mn