АН-ын дарга М.Тулгат “Онц их хурал”-ын талаар байр сууриа илэрхийллээ.
АН-ын дарга М.Тулгат “Энэ сарын 05-нд Ардчилсан намын “Онц их хурал” болж, намын гишүүд Монгол орны өнцөг булан бүрээс ирж хуран чуулсан. Ардчиллын үйл хэрэгт санаа зовж газрын холоос ирсэн, үгээ хэлсэн, оролцсон, дэмждэг хүн бүхэнд талархал илэрхийлмээр байна. Онц их хурлаас хоёр өдрийн өмнө бид байр сууриа илэрхийлсэн. Мэдэгдэл гаргасан.
Нэг бүдэрвэл долоо бүдэрнэ гэдэг. Өнөөдрийн үүсээд байгаа нөхцөл байдлыг шийдэхийн тулд маш нухацтай, алдаагүй, дүрмийн дагуу хийх ёстой гэсэн байр суурь илэрхийлсэн. Ардчилсан нам үндсэн дүрэмтэй. Дүрэмд онц их хурал гэж байхгүй. Намын нэг хэсэг нөхдүүд маань тухайн хурлыг хүлээн зөвшөөрөхгүй гэсэн байр суурьтай байгаа.
Тиймээс хамтарсан ажлын хэсэг байгуулж талуудын оролцоог жигд хангах ёстой. Ардчиллын зарчимд бүгд 100 хувь санал нэгдэнэ гэж байдаггүй. Гэхдээ голлох хэсгийн хүмүүсээ оруулахгүйгээр хүч түрж хийвэл эв нэгдлийн асуудал бүр байхгүй болно. М.Тулгат намын даргаас зууралдаад, сандал ширээтэй холбоотой санаа тавиад гүйгээд байгаа хүн ердөө биш.
Ардчилсан нам руу өнгөрсөн жилүүдэд зогсоо зайгүй дайрсан, ардчиллын үнэт зүйл рүү нулимж байсан хүмүүсийг оруулж ирээд орой дээрээ залж, алга ташин хүлээж аваад байгаа учраас санаа зовж байна. Ардчилсан нам хогийн сав шиг эрээвэр хураавар булингартай, үзэл баримтлал жанжин шугам нь ойлгомжгүй болсон. Тиймээс бид асуудлаа үндсээр нь шийдэх ёстой.
Ямар нэгэн даргыг сонгосноор, удирдлагын бүтцийг томилсноор намын үндсэн асуудал шийдэгдэхгүй. Шинэчлэлийг нэг мөр хийх ёстой. Амаргүй нөхцөл байдалд орж байна. Гэхдээ Ардчилсан нам эвээ олно гэсэн итгэл алдраагүй байна. Дахиад сорилттой тулгарч байна.
Сая дарга цэргээ сонгосон намын нөхдүүддээ хандаж хэлэхэд цаашид хууль шүүхийн асуудал нь явдгаараа яваг. Монгол Улс хуультай орон. Ардчилсан нам дүрэмтэй. Улс төрийн хүчний хувьд Ардчилсан нам үзэл санаа бодлого мөрийн хөтөлбөрөөр нэгдэж байх ёстой. Тиймээс бодлого судалгааны төв хамтарч байгуулах, Ардчилсан намын үндсэн дүрэмд өөрчлөлт оруулах асуудалд хамтарч ажиллах зэргээр хамтран ажиллах боломжтой” гэж мэдээллээ.
Г.Мичид
