Со гавьяат нэгэнтээ “Мадонна бид хоёр нас чацуу, 1958 оны нохой жилтнүүд ш дээ” гэж байлаа. Солонгосын нэрт жүжигчин Chang Mi Hee мөн 1958 оны нохой жилтэй, Д.Сосорбарам гавьяаттай “он жавууд”. 
Chang Mi Hee-г бид саяхан Боловсрол телевизээр гарсан “Надтай гэрлээч” киногоор нь сайн мэднэ. Тэрээр энэ кинондоо 2018 онд буюу 60 насандаа тоглосон. Оройгүй баян хатагтайн дүрд тоглосон Chang Mi Hee-г монголчууд 60 настай гэж төсөөлөөгүй. Эрхэмсэг, тансаг, баян хатагтайн дүрийг бүтээдэг энэ жүжигчинг 40 настан шиг харагдаж, хөгжлөө дагаж хүн төрөлхтөн залуужсан, нас бол тоо гэдгийг харуулсаар яваа нэгэн.
Жүжигчин Chang Mi Hee 1958 оны 1-р сарын 27-нд төрсөн нь Өмнөд Солонгосын жүжигчин юм. Тэрээр БНСУ-ын нийслэл Сөүл хотод төрсөн, хотын уугуул. Чан 1976 онд анхны кинондоо тоглож, жүжигчний карьерээ эхлүүлжээ. Залуу наснаасаа жилдээ нэг л кинонд тоглодог зантай, Солонгсын кино академийн бүхий л шагналыг “түүжээ”. Харин хувийн амьдралын хувьд насаараа гэрлээгүй, ганц бие явсан. Цуутай хүүхэн хуримгүй гэдэг л энэ байх.
Нас нь 63 хүрсэн Chang Mi Hee одоо ч Солонгост хамгийн үнэ хүндтэй, өндөр ханштай жүжигчин. Солонгосын үе үеийнхний шүтээн болсон энэ жүжигчин бүсгүй амьдралдаа нэг ч удаа гэрлэж байгаагүй, хүүхэдгүй. Нас нь 63 хүрч байгаа энэ жүжигчин эмэгтэйн хувийн амьдралыг тойрсон цуу яриа их бий. Сайхан бүсгүйг хов дагадаг гэлцдэг. 
Юутай ч энэ жүжигчнийг насаараа Солонгосын нэг экс ерөнхийлөгчийн нууц амраг явсан, тиймээс хүүхэд төрүүлээгүй. Солонгосын тэргүүн хатагтай нөхрийнхөө нууц амрагийг хүчээр авч явж, савыг нь авахуулсан, мөн Солонгосын тэргүүн хатагтайд “хорлогдоод” хүүхэд гаргах боломжгүй болсон гэж домог шиг яригддаг. Юутай ч нэгэн жарныг элээж, үе үеийн солонгос эрчүүдийн нүдийг хужирласаар яваа энэ хатагтай жилдээ нэг л кинонд тоглож, өөрийнхөө ая таваар, тансаг эрхэмсэг амьдарч явна.
