Сүүлийн жилүүдэд Ерөнхийлөгчөөс эхлээд салбарын сайд гэхчлэн том албан тушаал хашсан эрхмүүдийг таагүй тавилан хүлээдэг болсон.
Тэд халаагаа өгч, суудлаасаа буугаад “аав”-ынд залардаг хууль Монголд үйлчилж байна. Тэр дагуу экс Ерөнхийлөгч Х.Баттулга ч хууль, хүчний байгууллагын үүд сахих цаг хугацаа тун удахгүй айсуй. Гэхдээ тэр одоогийн Ерөнхийлөгч У.Хүрэлсүхтэй харилцаа сайтай байгаа учраас өөрөө болон тойрон хүрээлэгчдэдээ ч цаг хожихыг бодоорой гэж захижээ.
Тэгж гэмээнэ ямар нэг албан тушаалд очиж, “аав”-ынхаар зочлохгүй байх арга хэмжээ авахаар болж. Мань хүнээс гадна туслахууд нь ч хилийн чинадад “томилолт” өвөртлөн явахаар болсон тухай бид өмнө нь мэдээлсэн. Уг нь экс Ерөнхийлөгч Х.Баттулга МҮОХ-ны ерөнхийлөгчийн суудлыг эзэгнэн, эх орондоо байх гэсэн ч хуулийн байгууллагынхан зүгээр суулгахгүй нь тодорхой болчхож.
Тиймээс дархан эрх эдлэхийн тулд УИХ-ын 28 дугаар тойргийн нөхөн сонгуульд нэр дэвших нь оновчтой гэж үзжээ. Төрийн тэргүүнээр дөрвөн жил ажиллахдаа тус дүүргийнхэнд халтай байсан нь бага.
Дээр нь эзэмшлийн үйлдвэрүүд нь СХД-т байрладаг гээд түүнд хэд хэдэн давуу тал бий. Дээрээс нь өөрт нь үнэнч АН-ын дарга гэгдэж буй УИХ-ын гишүүн О.Цогтгэрэлийн ТЕСО ч бий. Тиймээс Х.Баттулга нөхөн сонгуульд нэр дэвшихэд айх зүйлгүй. Тиймээс ч У.Хүрэлсүхийг тэр болтол хуулийнхныг “дуугүй” байлга, МАН-аасаа зөөлөн “боов” илгээнэ биз хэмээн үүрэгдсэн аж. Товчхондоо улстөрийн тогоонд өрсөлдөгчид ч амьдрал дээр хуурай ах, дүү бололцсон тэдний хувьд нэгэндээ барьж буй бэлэг нь УИХ-ын нөхөн сонгууль болж таарч байна.
Эх сурвалж: Erennews.mn
