ҮНДЭСНИЙ БАЯР НААДМАА ХЭРҮҮЛИЙН ТАЛБАР БОЛГОН ХУВИРГАХ САНАА MОНГОЛ ХҮНЭЭС ГАРАХГҮЙ

Монгол төрийн бахархан тэмдэглэдэг Үндэсний их баяр наадмын товлосон өдөр болоход гуравхан хоног дутуу байна. Засгийн газар энэ жил баяр наадам тэмдэглэхгүйгээр шийдсэн нь ард түмнээ хоёр, гурав түүнээс илүү талцан хуваагдахад хүргэж, наадмын өмнөх өдрүүд жагсаал цуглаантай, хэрүүл маргаантай өнгөрч байна.

Зургадугаар сарын сүүлчээр “No naadam” уриатай жагсагчид наадмыг эсэргүүцэн жагссан нь монголчуудыг талцан хуваагдахад хүргэж, Засгийн газрыг наадам хийхгүй гэж мэдэх хүртэл шахалт үзүүлсэн билээ. Энэ жагсаалыг санаачлагчдыг хуулийн байгууллагууд нийгмээ хуваан талцуулах зорилгоор гадны байгууллагын захиалгаар жагсаал хийсэн гэдэг үндэслэлээр шалгаж байгаа юм. “No naadam” уриа лоозон барьж жагссан иргэд Үндэсний их баяр наадмыг эсэргүүцэхийн хамт ковид-19 халдварын улмаас эдийн засаг нь хүндэрсэн аж ахуйн нэгжүүдийн үйл ажиллагааг хэвийн явуул гэсэн хоёрдмол агуулгатай жагсаж байсан.

Жагсагчид үнэхээр коронавирусын халвараас айсан бол өвчлөл хамгийн оргил цэгтээ хүрсэн үед аж ахуйн нэгжүүдийн үүдийг нээж, хүн олноор цуглах, халдвар хэд дахин нэмэгдэх шаардлага тавихгүй байсан.

Нөгөө талаар Монгол Улс дан ганцаараа халдварын эрсдэлд ороогүй. Дэлхийн бүх улс орон ковидтой тэмцэж, түүнийхээ хажуугаар үндэсний онцлогоо харуулах баяр наадмаа тэмдэглэсээр байгаа. Япон сумо бөхөө барилдуулж, үндэсний дэг жаягаа дэлхий нийтэд гайхуулж байгаа.

АНУ-ын Мэргэжлийн сагсан бөмбөгийн тоглолтууд, Евро хөл бөмбөгийн тоглолтуудыг бид өнөөдөр цэнхэр дэлгэцээр үзэж л суугаа. Эндээс “No naadam” жагсаал нийгмийг сэтгэл зүйг тогтворгүй болгон үймүүлэх зорилготой, иргэдийг талцуулах санаа тээгдсэн нь ч тодорхой харагдаад байгаа.

Тиймээс Засгийн газрын Ардын хувьсгалын 100 жилийн ойн баяр наадмыг зогсоосон шийдвэрт нийгмийн нэг хэсэг, Монгол наадмыг бүрдүүлдэг, үндэсний өв соёлыг тээгч уяачид, бөхчүүд, сур харваачид, наадмаа хүндлэн дээдэлдэг энгийн иргэд дургүйцэж байна.

Өнөөдөр тэдний нэг хэсэг нь Д.Сүхбаатарын талбайд Монгол наадам тасрах ёсгүй. Монгол дархлаа сулрах ёсгүй. Монгол наадам тусгаар тогтнолын баталгаа юм гэсэн уриа лоозонгуудыг бариад жагслаа. Тэд Засгийн газар Монгол Улсын тусгаар тогтнолын билэгдлийг агуулж байдаг Монгол наадмаа хийх ёстой гэсэн шаардлагыг тавьж байгаа юм.

Зэрэгцээд Төв талбайд Эрүүл мэндийн салбарынхны цалингаа нэмүүлэхийг шаардан суулт олон өдрөөр суулт хийж монголчууд энэ жилийн наамдаа хэрүүл шуугиантай угтаж байна. Зуунаас зуунд дамжин бахархан тэмдэглэж ирсэн Монгол үндэстний их баяр наадам, Цагаан сараа монголчууд хэрүүл шуугиантай өнгөрүүлэхээс цэрвэдэг. Өвгөдийн өв, ардын ёс заншил, ирээдүй цагийн бэлэгдэл зэргээ бодож илүү хүндэтгэлтэй тэмдэглэн өнгөрүүлдэг Үндэсний баяр наадмыг хэрүүлийн талбар болгон хувиргах санаа монгол хүнээс хэзээ ч урган гаргахгүй.

Энд гадны захиалга, монголчуудыг талцуулан хэрэлдүүлэх их хүсэл тээгдэж байгаа юм биш биз.
Манжийн дарлалд өнгөрөөсөн 200 жилийн гашуун түүх монгол ноёдын урвалт, гадны этгээдүүдийн үндэстнийг талцуулан доройтуулах хүсэл, түүндээ хүрэхийн тулд амлаж байсан шан харамж, хэргэм цол, авлигаас үүдсэн байдаг.

Монгол үндэстний хагалан бутаргах гэсэн Манжууд ч санасандаа хүрч Монгол орныг доройлтуулж чадсан.
Монголчууд дотроо хагаралдан тэмцэлдэхдээ тарж бутарч, сарнин харь орны эрхшээлд орж явсан байдаг. Монголчуудыг дотор нь талцуулан, сульдаах нь их гүрнүүдийн, харь орныхны мөрөөдөл байдаг. Энэ жил тэмдэглэх байсан Ардын хувьсгалын 100 жилийн ой, Үндэсний баяр наадмын өмнөх хэрүүл, “No naadam” жагсаалаас эхтэй бусад эсэргүүцлийн арга хэмжээнүүд Манжийн дарлалд 300 гаруй жилийн өмнөх гашуун түүхийг давтаж байгаа юм биш байгаа.