“Эрдэнэс тавантолгой” компаний захирал Б.Ганхуяг шинэ оны босгон дээр Аж үйлдвэрийн гавьяат ажилтан болсон. Монголын иргэн бүрт хувьцааны мөнгө шилжүүлж, Төмөр зам барьсан мөнгийг энэ компани гаргасан. 
Иймэрхүү хэмжээний Төрийн өмчит томоохон компаниудын төсөв хөрөнгөний зарцуулалт сүүлийн үед анхаарал татаж байгаа. Тухайлбал, “Эрдэнэт үйлдвэр”-ийн захирал хүүхдийнхээ сургалтын төлбөр болох 102 сая төгрөгийг компанийн данснаас төлүүлсэнасуудал гарсан.
“Эрдэнэс Тавантолгой” компанийн данс тайланд ч эргэлзээтэй зүйл харагддаг. Тус компани МҮОНТ-ээр цацагдсан “Будда” хэмээх 55 ангитай олон ангит киноны эрх худалдан авч олон нийтэд түгээхэд зориулан 150 сая төгрөгийг “Монголын сүсэгтний холбоо” НҮТББ-ын Хаан банкны дансаар шилжүүлсэн байна.
Түүнчлэн шинэ жилийн арга хэмжээ зохион байгуулахад зориулж “Фантастик продакшн”-д 30 сая төгрөг шилжүүлжээ. “Эрдэнэс Тавантолгой” компани 10 жилийнхээ ойд зориулан компанийнхаа сүлд дуу бүтээх ая, шүлэг, клип, шторк уран бүтээлийг хийлгэхэд зориулан 39.5 сая төгрөг, ойн хүрээнд спортын арга хэмжээ зохион байгуулах бай шагналд 27 сая төгрөг зарцуулсан нь залуухан захирал Б.Ганхуяг гар султай, нэлээн хөлтэй хөдөлдгийг харуулна.
