Эрэгтэй, эмэгтэй хоёр хүн хэзээ ч сайн найз байдаггүй гэдэг. Харин энэ үг худлаа болохыг харуулж, ажил, амьдрал дээрээ гар нийлдэг сайн найз уран бүтээлч цөөнгүй бий. 
Тухайлбал дуучин Зоригт, Хишигдалай хоёр. Тэр хоёрын хамт дуулсан дуу бүхэн хит болж, олон тоглолтод хамт уригдан оролцдог. Тэгээд ч амьдрал юу гэж үргэлж тайзан дээрх шиг гялгар гялтгар байхав. Сайдаж муудаж, хоорондоо зодолдохдоо тулж байсан үе ч бий гэдгээ ярьсан. Гэсэн ч эргээд эвлэрч, одоо ч хамт дуулсаар. Яг одоо тэд телевизийн “Гэнэтийн зочид” олон ангит киноны дууг дуулсан нь ид хит болж байна.
Рок попоос Зоригт, Хишигдалай хоёр сайн найз бол нийтийн дуучид дунд ч сайн найз эрэгтэй, эмэгтэй хоёр бий. Тэр бол хошин урлагийн жүжигчин Л.Сөрөлт, А. Түмэн-Өлзий хоёр. 
Тэр хоёрын дуулсан дуу бүхэн хит болдог. Хамтдаа хэд хэдэн тоглолтын ард гарч, ажил амьдралын сайн найзууд болсон. Тэд тоглолтоор явахдаа Завханы Тосонцэнгэлд гар зөрүүлсэн хөгжилтэй дурсамжтай.
Мөн УДЭТ-ийн жүжигчин Г.Амгаланбаатар, “Аримун” продакшны жүжигчин Д.Ганцэцэг хоёр кино жүжигт олон удаа хослон тоглосон. Тэд амьдрал дээрээ сайн найзын харилцаатай. Сая шинэхэн МУГЖ Д.Ганцэцэг “Ододтой бүжиглэе” шоунд ороход хамгийн их дэмжсэн хүн нь жүжигчин Амгаланбаатар. Амгаланбаатарын ар гэрийнхэн нь ч аавынхаа найз Д.Ганцэцэгийг дэмжин, саналаа өгөхийг уриалж байсан билээ.
