Сумогийн их аварга Хакухо хувь хүний хувьд эерүү зөөлөн, хүнтэй нийцтэй болохоор ч тэр үү, эсвэл япон эхнэртэй болохоор ч тэр үү япончууд харьцангуй сайн ханддаг. Монгол их аварга Ж.Мөнхбатын хүү Хакухо сумо бөхийн олон рекордыг эвдэж сумо бөхийн ертөнцөд оргил, домог болон үлдэх боллоо. Япон гэргийтэй Хакухо бусад аваргуудаа бодвол хамаагүй “японжиж” “японоор уйлж инээх” шахдаг.
Монгол бөхтэй гэрлэсэн Хакухо аваргын эхнэр ч монголжиж, гэртээ бууз чимхэн хуушуур хайрч, Хакухо аваргыг шартсан үед гурил имэрч, бантан хүртэл чанаж өгдөг гэдэг. Хүргэн хүү хүчтэй гэдэг. Япон сурвалжлагчид Хакухо аваргаас “Манай улсын иргэн болох уу?” асуултыг хамгийн их асуудаг байсан. Хакухо японы телевизийн ярилцлаганд орохдоо энэ “Аавыгаа амьд байхад иргэншлээ солих тухай бодохгүй” гэж хариулж байсан билээ. Хакухо хэлсэн амандаа хүрсэн. Аавыгаа бурхан болсноос хойш гурван жилийн дараа иргэншлээ сольж, Япон улсын иргэн боллоо.
Хакухо японд ярилцлага өгөх болгондоо “Аав маант Монголын үндэсний бөхийн аварга, Олимпийн мөнгөн медальт тамирчин хүн. Токиод болох 2020 оны олимпийг аавтайгаа хамт үзэх хүсэлтэй” гэж ярилцлага өгдөг байсан. Дэлхийг хамарсан цар тахлын улмаас Токио 2020 олимп 2021 он хүртэл хойшилж, Хакухо Даваажаргалын аав Монголын хүчтэй аваргуудын нэг Ж.Мөнхбат аварга өдгөө бидний дунд алга.
