Coниxoн дээрээ гоёхон гэдэг шиг УИХ-ын зарим шинэ гишүүн нийгэмд гоё харагдахын тулд байдгаараа хичээж байна. Тэдний нэг нь УИХ-ын гишүүн Х.Ганхуяг. Сүүлийн үед түүний сошиал попрол хэрээс хэтрэв. Ярихгүй сэдэв, оролцохгүй бодлого, мэдэхгүй зүйл түүнд алга.
Сүүлдээ Засгийн газар, Улсын онцгой комисс, яамдын өмнөөс байр суурь илэрхийлж хэвлэлийн төлөөлөгч аятай цамнах нь “УИХ-ын гишүүн бүгдийг мэддэг” гэж боддогийг харуулна. Хамгийн сүүлд л гэхэд “Асуулт байвал энэ постны дор бичээрэй.
Бүгдэд нь цаг гарган хариулна” хэмээн жиргэжээ. Иргэд хил хэзээ нээх, тусгаарлалтын хоногийг багасгах уу гэх зэрэг олон асуулт асууж, гишүүн ч хариулсан байна. Гэхдээ УИХ-ын гишүүн хил хэзээ нээх, тусгаарлалтын хоногийг сунгах эсэхийг шийдэх эрх бүхий албан тушаалтан биш юм. Дэлхий нийтээр цар тахал тархсан энэ цаг үед эрх бүхий албан тушаалтан ч толгой мэдэж хил нээх, тусгаарлалтын хоногийг сунгах, багасгахыг шийдэхгүй.
Цаг үеийн нөхцөл байдлаас шалтгаалж, УОК хуралдан санал гаргаж, Засгийн газар тогтоол гарган баталгаажуулдаг зарчмаар шийдвэр гаргаж байгааг эрхэм гишүүн мэддэг байлтай. Уг нь парламент бүрдсэний дараа УИХ-ын Тамгын газраас шинэ гишүүдэд УИХ-ын үйл ажиллагаа, дүрэм журам, гишүүний ёс зүйн талаар хичээл заасан ч, Х.Ганхуяг гишүүнд Тамгын газар жижигдсэн бололтой. Эсвэл тэнд, сошиалаар бүх сэдвээр ярьдаг, хариулт хэлдэг, байр суурь илэрхийлдэг магадгүй бусадтай хэрэлдэж, хараалын үг хэлэх нь Их хурлын гишүүний хийх ажил ч, гаргах үйлдэл ч бишийг заагаагүй бололтой юм.
Ер нь УИХ-ын гишүүн Х.Ганхуяг гэж хэн бэ. Тэрээр анх удаа Их хуралд сонгогдож байгаа залуу гишүүдийн нэг. Их хурлын сонгуульд МАН-аас 26 дугаар тойрог буюу Баянгол дүүрэгт нэр дэвшин сонгогдсон. Өмнө нь ХҮН, АН-ын гишүүн байсан. Мөн 2016 оны Их хурлын сонгуульд Баянгол дүүрэгт бие даан нэр дэвшин ялагдаж байв. Тэрээр улс төрд хүч үзэж, нэг бус сонгуульд оролцож, ялж, ялагдаж үзсэн туршлагатай. Энэ хугацаанд тэрээр гурван намд элсч, нэг удаа бие даан нэр дэвшиж байв. Харин тэрээр 2020 оны сонгуульд АН-аас нэр дэвшинэ хэмээж байв.
Харин нэг л өдөр намын даргаа хусч, АН-д 100 сая төгрөгийн дэнчин өгсөн хүмүүсийн нэрийг зарлан хэвлэлийн бага хурал хийснийхээ дараа МАН-аас Баянгол дүүрэгт нэр дэвших болсон юм. Үүнээс харахад тэрээр АН-ын нэр хүндийг унагаасныхаа шагналд МАН-аас УИХ-д нэр дэвших мандат авчээ гэж хардаж болох. Өөрөөр хэлбэл, 2020 оны сонгуулийн өмнөхөн МАН-д тооноор орж ирсэн хүмүүсийн нэг нь Х.Ганхуяг гишүүн мөнөөс мөн.
Түүний УИХ-ын гишүүн болох хүртэлх улс төрийн замнал адармаатай байсан байж болох ч, өнөөдөр УИХ-ын гишүүн учраас алдах эрх түүнд байхгүй. Алдааг бага дээр нь засвал хувь хүнд нь ч, УИХ-ын нэр хүндэд хэрэгтэй учир төрийн түшээ л гэхээр заавал юм бүхнийг мэддэг байх албагүй, бүгдэд таалагдах гэж хичээх хэрэггүйг сануулж бичив. Бөхчүүдийн хэлээр бэлтгэл цөмөрнө гэдэг шиг гоё харагдах гэсэн хэт их хичээлт цөмөрч, попролт болж эхэллээ Х.Ганхуяг гишүүн ээ!
Эх сурвалж: Itoim.mn
