Үндэсний эвслийн дарга Н.Номтойбаяр цаг үеийн асуудлаар мэдээлэл өглөө.
Тэрээр “Төрийн нууцад авсан нүүрс худалдааны гэрээний зөвхөн хавтсыг нь үзүүлээд дараа нь ямар нэг улс төр болохоор тэр хүнд нь зориулж нэг хуудас нээгээд байна. Тиймээс нууцаас гаргаж, УИХ-аас Хянан шалгах түр хороо байгуулж шалгах ёстой гэж үзэн Үндэсний эвслийн дөрвөн гишүүн тогтоолын төсөлд гарын үсэг зурсан.
Мөн Үндэсний эвслийн гишүүд дөрвөн шалтгааны улмаас Засгийн газрыг огцруулах нь зөв гэж үзэн гарын үсэг зурсан. Үүнд:
Нэгдүгээрт, Намын асуудлыг төрийн зовлон, улмаар төсвийн зовлон болгож байна. Батлагдсан дүрэм журмаас хальж өөрт нь таалагдахгүй шийдвэр гарахаар эсэргүүцэж, улс төр болгодог.
Хоёрдугаарт, Өчигдөр ХЗДХ-ийн сайд Л.Мөнхбаатар маш ноцтой мэдэгдэл хийсэн. Ерөнхий сайд Хууль зүйн сайдаасаа хууль бус үйлдэл хийхийг шаардсан. Үүнийг ХЗДХ-ийн сайд зөвшөөрөөгүйгээс үүдэлтэй түүнийг орлуулах асуудал хөндөгдөж байна. Энэ хэн нэгэн хүний асуудал биш бид хуулиа л дээдлэх ёстой. Би ч бас ингэж хэлмэгдэж, хоригдож байсан.
Хууль хүчний байгууллагыг бороохой болгож улс төрд ашиглахыг хэрхэвч зөвшөөрөхгүй. Хэн нэгнийг хэлмэгдүүлэхийг би зөвшөөрөхгүй.
Гуравдугаарт, Нийгэм эдийн засгийн үзүүлэлтээ хар. Муу үзүүлэлт нь л өсөөд байгаа. Сайн үзүүлэлт нь огт өсөхгүй байгаа. Засгийн газар үйл ажиллагаагаа явуулаад 100 гаруй хоногт болж байна. 100 хоног бол маш урт хугацаа. 30 хоноход л үр дүн харагдаж эхэлдэг шүү дээ.
Дөрөвдүгээрт, Энэ Засгийн газар маш чадамжгүй байна. Бид орж ажиллая. Ажлаа хийж чадахгүй хүмүүсийг сольё. Би чадна гэдэгтэй итгэлтэй байна. Үндэсний эвсэл Засагт орж ажиллахын төлөө Засгийн газрыг огцруулахыг дэмжиж гарын үсэг зурсан” гэв.
