Бид ОХУ-аас автобензин, дизель түлшээ 100 хувь худалдан авдаг. Тус улсын “Роснефть” компанийн Ангарск дахь газрын тос боловсруулах үйлдвэрээс дийлэнх шатахуунаа импортолж байна.
Жил бүрийн наймдугаар сард энэ үйлдвэрт засвар хийдэг. Энэ хугацаанд шатахууны нийлүүлэлт тасарч болзошгүй тул ургац хураалт дуустал урсгал засварыг хойшлуулах хүсэлтийг манай талаас тавьсныг хүлээн авчээ.
ОХУ-ын баруун нутагт байршилтай, газрын тос боловсруулах хэд хэдэн үйлдвэр Украины дроны дайралтад өртсөн. Иймд тус улсад шатахууны нийлүүлэлт буурч, үнэ өсжээ. Харин бид хоёр улсын Засгийн газрын хооронд хийсэн гэрээний дагуу, Москвад борлуулдгаас бага үнээр шатахуунаа авсаар байна. Гэвч энэ таатай байдал удаан үргэлжлэхээргүй нөхцөл үүсжээ.
Хойд хөршид шатахууны үнэ өссөн тул манай улсад ирэх оноос шатахууны үнэ өсөж болзошгүйг нефть импортлогч ААН-үүд анхааруулав. Үнэ өссөний сацуу ОХУ-ын Засгийн газраас жижиг нийлүүлэгч, тээврийн компаниудын татаасыг зогсоожээ. Ингэснээр тэд үнээ нэмэх нь гарцаагүй.
Энэ сарын 1-ний өдрийн байдлаар дизель түлш шатахуун түгээх станцуудад 2940-3040 төгрөгийн үнэтэй байна. Аи-76, 80 шатахуун 2315-2370 төгрөгийн, Аи-92, 93 шатахуун тогтмол 2,590 төгрөгийн үнэтэй байв.
Харин Аи-95 нь 3510-3610 төгрөгийн үнэтэй байна.
| Шатахуун түгээх станц | Дизель түлш | Аи-95 | Аи-92, 93 | Аи-76, 80 | Газ |
|---|---|---|---|---|---|
| Жаст ойл | 2,940 | 2,590 | |||
| Магнай трейд | 3,040 | 3,510 | 2,590 | ||
| Петровис | 3,040 | 3,610 | 2,590 | 2,370 | |
| Сод монгол | 2,940 | 3,510 | 2,590 | 2,315 | |
| Шунхлай | 2,940 | 3,610 | 2,590 | 2,350 | |
| Юнигаз | 1,950 |
