Хөгжлийн банкны найдваргүй 25 зээлдэгчийн 2 нь Ерөнхийлөгч асан Х.Баттулгын хамаарал бүхий нөхөд гэдгийг хэвлэлүүд хангалттай баримтаар нотлон мэдээллээ.
“Нью яармаг хаусинг прожект” гэхэд Хөгжлийн банкин дахь зээлээ төлөлгүй 56 сар буюу бараг 5 жилийн нүүр үзэх гэж байна. Жирийн нэг бизнес эрхлэгч байсан бол хэдийнэ өмч хөрөнгөө хураалгаж, шүүхээр ял асуулгаад, хилээр орох гарах эрхээ хаалгаад хорих ангид хэвтэж байх байсан биз.
Гэтэл Ерөнхийлөгч асан Х.Баттулгын орон тооны зөвлөхөөр ажиллаж байсан Ц.Ууганбаяр гэгч энэ компанийн захирал залуу Х.Баттулгын сүүдэр мэт салалгүй дагасаар 2015.05.28-нд 142.4 тэрбум төгрөгийн зээл авч байж. АН засагласан жил, Н.Батбаяр бондын хөрөнгийг богдын боов тараах мэт баруун, солгойгүй цацаж байх үеэр авсан гэсэн үг.
19-тэйгээсээ Х.Баттулгыг дагаж, цүнхийг нь тэвэрч гүйсээр нэг хэсэг төмөр замын дуулианаас үүдэлтэй эх орноосоо дүрвэж байсан байдаг.
Харин 212.2 сая төгрөгийн өртэй “Кью Эс си” гэхэд улс төр, бизнесийнхний бүлэглэлийн гол дүр гэдэг нь нэгэнт тодорхой болсон Худалдаа хөгжлийн банкны сахал хочит Д.Эрдэнэбилэгийн хамаарал бүхий компани. “Ти Ар Эм эксплорэйшн”-ийн эзэмшил гэсэн үг. Сахал хочит Должингийн Эрдэнэбилэг Халтмаагийн Баттулга нар спортоор холбогдож нөхөрлөөд эцэстээ эд мөнгө, эрх мэдлээс болж хагаралдан холдсон ч “Талх чихэр” компанийн хувьцаа эзэмшигчид.
“Талх чихэр Улаанбаатар” компанйн захирал Т.Болдхүү Улаанбаатар банкны хувь нийлүүлэгчдийн 2003 оны 10 дугаар сарын 15-ны өдрийн 03 тогтоолоор тус банкны дүрмийн санг таван тэрбум төгрөг болгон нэмэгдүүлэх үед 1.5 тэрбум нийлүүлсэн томоохон хувь нийлүүлэгч болж гэнэт гарч ирсэн учир битүүлэг нөхөр. Тэгэхээр нийслэлээр овоглож, нийслэлд үйл ажиллагаа явуулдаг л бол мөнгөө Улаанбаатар санд төвлөрүүлж, Улаанбаатар банкаар үйлчлүүл гэх тухайн үеийн хотын эрх баригчдын “зохион байгуулалттай мөнгө угаах” төлөвлөгөөгөөр босч, эцэстээ Худалдаа хөгжлийн банкинд уусан замхарсан Улаанбаатар банкны хөрөнгө Д.Эрдэнэбилэг, Х.Баттулга нарын гараар орж зүйл дууссан нь тодорхой. Эл бүгдээс үзвэл энэ хоёр эрийн “зодоон” хэсэг зуурын байсан бөгөөд түүнээ тэр чигт нь, бүр өнөөдрийг хүртэл хамтарч идсэн ууснаа халхавчлах ХӨШИГ болгон ашиглаж ирсэн болж таарч байгаа юм.
Тэрчлэн 2018.01.09-нд буюу МАН засаглаж, У.Хүрэлсүх гүйцэтгэх засаглалын тэргүүн болсны дараахан “Инжир” гээч компани Хөгжлийн банкнаас 5.6 тэрбум төгрөгийн зээл авсан ч эргэн төлөлгүй байсаар зээл, зээлийн хүү хуримтлагдаж 7.6 тэрбум төгрөг болжээ.
Сохор зоосны ч төлбөр хийгээгүй “Инжир” компанийн захирал Бат-очирын Батбаатарын нэр дээр “Стармираж констракшн” гэх компани байх бөгөөд албан ёсны хаяг болох Улаанбаатар, Баянгол, 1-р хороо, 2 хороолол, хатанбаатар магсаржав, 013, 20 тоотод “Ургах морин элс”, “Түвшин төр трейд” компаниуд бүртгэлтэй байгаа юм.
Үүнээс “Түвшин төр трейд” компанийг нь хөөвөл уяаны үзүүрт сонирхолтой мэдээлэл гарч ирнэ.
Тус компанийн захирал гэх Отгонсүрэнгийн Эрдэнэпүрэвийн хувьцаа эзэмшдэг “Глобал девелопмент партнерс” ББСБ-ын Улаанбаатар, Хан-Уул, 15-р хороо, Гэгээнтэн цогцолбор Фидес тауэр 203 хаяг дээр “Петромон индастри” ХХК-ийн захирал Даваагийн Цэнд гээч давхар бүртгэлтэй байдаг. Д.Цэнд нь Дүүжин тээврийн ашиглалтын өмнөх захиргааны дарга бөгөөд хотын дарга С.Амарсайханы хүн болж таарна.
Авто замын ачааллыг бууруулахын тулд дүүжин тээврийн замыг бий болгох тэнгэрийн мөрөөдөл хотын дарга асан С.Амарсайханых. Түүний мөрөөдлийн төсөлд 2021 онд 414 сая төгрөг төсөвлөж ашиглалтын өмнөх захиргаа нь энэ онд 51.9 саяар эд хогшил авч, 242.9 сая төгрөгийг цалинд зарцуулсан байгаа юм. Энэ газрын нэг ажилтан сар бүр гурван сая орчмын цалин авдаг гэсэн үг.
Тэрчлэн Д.Цэндийг НВЦ-ийн Ц.Баатарбилэгтэй хамааралтай нэгэн гэдэг бөгөөд тэрбээр “Үндэсний барилга консерциум”, “Хятад монгол ресурс групп”, “Хасуутрейд”, “Гэрэгэ женерал инженеринг”, “Гэрэгэ-Импекс”, “Гэрэгэпроперти”, “Гэрэгэконстракшн” ХХК-ийн хувь эзэмшигч.
Түүний хувь эзэмшил бүхий “Хятад монгол ресурс групп” нь Ц.Баатарбилэгтэй хамаарал бүхий гэдгийг нотлоход сэжүүр болно.
Тус компанийн хаяг дээр “Евро ази энержи интернэйшнл корпораци” гэх давхар бичигдсэн Хятадын хөрөнгө оруулалттай энэ компанийн хувьцаа эзэмшигч Цэдэндамбын Лхагвадорж гэж бий. Тэрбээр “Ворлд импекс” группийн захирал.
“Ворлд импекс групп”-ийн хувьцаа эзэмшгч нь Цэрэндаваагийн Баатарбилэг буюу олны мэддэгээр “НВЦ холдинг”-ийн эзэн. Гэхдээ тэрбээр “НВЦ холдинг”-оос нэрээ татчихаад байгаа.
Тэр НВЦ компаниараа Хөгжлийн банкнаас бүтээн байгуулалтаа санхүүжүүлэх нэрээр төсөл бичиж 21 сая ам.долларын зээл авсан ч мөнгийг зориулалтын дагуу ашиглаагүй, урьд нь авсан зээл, түүний хүүгийн төлбөрт өгч, үлдсэнийг нь шамшигдуулсан байсныг хууль хяналтынхан тогтоож байв. Үүнээсээ болж нэр, зүсээ татсанаас бус компанийн эзэмшигч хэвээрээ гэдгийг эх сурвалжаас хэлж байна.
Хөгжлийн банкийг дампууруулахад хувь нэмрээ оруулсан Монгема гэж компани Боловсрол, шинжлэх ухааны сайд Л.Энх-Амгалангийн хамааралтай гэдгийг намынхан нь хэлж, шүүмжлэлтэй хандаж байгаа. Тус компани 2017.10.31-нд 10.4 тэрбум төгрөгийн зээл авсан бөгөөд захирал Д.Лхагвадоржийнх нь нэр дээрх “НДБА”, “Монтоно” гэх хоёр компанийн нэг болох “Монтоно” нь “М Си Эс Хотел”-ийнх аж.
“М Си Эс Хотел”, “М Си Эс цамхаг” компаниуд нэг эзэнтэй гэдгийг улсын бүртгэл дэх хаягийн бүртгэл нь хэлээд өгөх биз. “М Си Эс цамхаг”-ийн захирал Жамбалжамцын Одын нэр дээрх “М Си Эс Цагаан дарь” гэх уран зургийн үйлчилгээ, бизнесийн чиглэлээр зөвлөгөө өгөх компанийн хувьцаа эзэмшигч нь Лувсанцэрэнгийн Энх-Амгалан байгаа нь Хөгжлийн банкны найдваргүй зээлдэгчдийн нэгээр зарлагдсан Монгена компанийн цаад эзэн гэгдэхэд хүргэсэн хэрэг.
Ийнхүү Хөгжлийн банкийг хувааж цөлмөөд эцэст нь дампууралд хүргэсэн найдваргүй зээлдэгчид нь Х.Баттулга, Д.Эрдэнэбилэг нарын Улаанбаатар банкийг замруулсан бүлэглэлтэй “цус” холилдсон эрх баригчид өөрсдөө байгаа нь МАН нэрийн дорх мафижсан дээрэмчдээс салах цаг, салах шалтаг болж, бухимдсан түмнийг нэгдэн босгоход хүргэж байна.
Үргэлжлэл бий…
Эх сурвалж: Niigmiintoli.mn
