Бар жилийн хаврын тэргүүн сарын шинийн нэгний өдөр Монголчуудыг хордуулж мэдэх, стандартын шаардлага хангахгүй байж болзошгүй 420 тонн тахианы мах хилээр нэвтэрчээ. Одоогоор хууль хяналтын байгууллага шалгаж эхэлж байгаа юм байна. Өмнө нь мэдэгдэхгүйгээр хэр хэмжээтэй эрүүл бус тахианы мах орж ирсэнийг тааварлах боломжгүй.
Хүнсний аюулгүй байдлын тухай хуульд тусгай зориулалтын хөргүүртэй, температурыг зохицуулах боломжтой, битүүмжилсэн тээврийн хэрэгслээр, -18 хэмээс багагүй температурт мах, махан бүтээгдэхүүнийг импортолно гэж заасан байдаг. Гэтэл зориулалтын хөргүүргүй, таваарын бараа тээвэрлэдэг чингэлгээр 420 тонн тахианы махыг БНХАУ-ын +4 хэмийн дулаан уур амьсгалтай Жининг хотоос 10 гаруй хоног тээвэрлэн Монгол Улс руу нэвтрүүлсэн байгаа юм. Стандартын бус хөргүүргүй чингэлгээр тээвэрлэн оруулж ирсэн тахианы махыг буцаах аль эсвэл шууд устгалд оруулах ёстой байтал НВЦ групп, Хос-Очир трейд, Агро ХХК, Батширээт ХХК, Далай цэнгэл ХХК, Хасхүү ХХК, Asian organic ХХК зэрэг нэр бүхий 7 компанийн импортоор оруулж ирсэн 10 чингэлэг тахианы мах аль хэдийнээ Улаанбаатар хотод буусныг эх сурвалжууд мэдээлж буй юм.
Стандартын бус хөргүүргүй чингэлгээр тээвэрлэн оруулж ирсэн тахианы махыг буцаах аль эсвэл шууд устгалд оруулах ёстой байтал Хилийн мэргэжлийн хяналтын газар дээрх арга хэмжээг аваагүй. Гаалийн ерөнхий газрын дарга, удирдлагууд ажлын хариуцлага алджээ. Энэ асуудлын ард албан тушаалаа урвуулан ашигладаг, авлига авдаг эрх бүхий албан тушаалтнууд ч байж мэднэ.
