ОХУ-ын “Россия 1” сувгаар Орос орны шинэ үеийн түүхийг өгүүлсэн “Новейшая история” баримтат киног үзүүлжээ. Энэ бүтээлд тус улсын ерөнхийлөгч Владимир Путин 1991 онд Зөвлөлт Холбоот Улс задарсан түүхэн үйл явдлын талаар ярьсан юм. Тухайн үед эдийн засгийн нөхцөл байдал хүнд байснаас нэмэлт орлого олохын тулд хааяа таксинд явдаг байснаа Путин дурсжээ.
“Заримдаа би нэмэлт орлого олохоос өөр аргагүй болдог байлаа. Энэ нь хувийн машинаараа таксинд явна гэсэн үг. Одоо дурсахад тийм таатай зүйл биш ч бодит байдал ийм л байлаа” гэж тэр ярьсан юм.
1990-ээд оны үед Орос улсад такси ховор, ихэнх хэрэгцээг хувийн автомашинууд гүйцэлдүүлдэг байжээ. Зарим тохиолдолд албаны автомашин, тухайлбал түргэний машинаар хүртэл таксинд явдаг байсан гэдэг. Путин 1991 онд Зөвлөлт Холбоот Улсыг задарсны дараа КГБ дэх ажлаасаа гарч, Санкт Петербург хотын дарга Анатолий Собчакын ажлын албанд орж байв.
Тэрбээр Зөвлөлт улс задарсанд харамсаж явдгаа дээрх баримтат кинонд орохдоо ярьжээ. “Энэ бол Зөвлөлт Холбоот Улсыг задлах нэрийн дор Оросын түүхэн газар нутгийг хуваасан явдал юм” гэж Путин харамссан байна. Өрнөдийнхөн энэ хуваагдал цааш үргэлжилж, ОХУ задрах нь цаг хугацааны асуудал гэж тооцоолж байсан гэдэгт итгэлтэй явдгаа тэр бас ярьсан юм.
Эх сурвалж: BBC
