Халх голд тулалдсан Монгол эрчүүд зурам шүүрч байгаа бүргэд шиг япон цэргүүдээс хулгайлаад ирдэг байж. Тэр тусмаа эхнэр хулгайлж авдаг казахууд бүр илүү ч байсан байж мэднэ. Хамгийн гайхалтай нь Монголын ардын анги, отряд нь япон хэлтэй хүн байгаагүй гэж БНМАУ-ын баатар Шагдарсүрэн гуай “Монгол тулгатны 100 эрхэм” нэвтрүүлгээр орохдоо ярьж байна лээ. Тэгэхээр олзлогдсон япончууд бэлгэ тэмдэг төдий, эр зоригийн илэрхийлэл гэж ойлгож болох байх. Халх голын дайнаас дутахааргүй зүйлтэй өнөө цагт тулгарсан гэдгээ Ерөнхий сайд У.Хүрэлсүх яриад байгаа шүү дээ. Бэхлэлт хориглолт, (Халх гол ухсан окопууд, замын бэрх саадууд санаанд орно) тулааан, (Буу сум шунгинаад, сэлэм гялалзаад л танк, их буу тэрээс утаа савсаад л) олон хоногийн уйтгартай байлдаан (Орос цэргүүд тамхиа ороогоод л спиртээ уугаад, уулын цаана буу дуу тачигнаж гэрэл гялбаад л) гардан тулаан (Байтаг богд ууланд цус нөжиндөө холилдсон цэргүүд буу сумаа дуусгаад хүрзээ бариад дайсан руу дайрдаг шиг) дүрслэл санаанд бууна.
Магадгүй У.Хүрэлсүх энэ бүгдийг ярихдаа маршал Х.Чойбалсан, К.Жуков нарыг төсөөлөн өөрөө Халхголд байгаа мэт ярьсан даа. Ямартаа ч фронт командлагч У.Хүрэлсүх тэргүүтэй нөхдүүд өнөө цагийн дайн тулаанд орж байгаа нь үнэн юм.
Гэхдээ бас нэг ойлгомжгүй зүйл байна. Тухайлбал Коронавирусийн эсрэг эм дэлхий нийтэд огт гараагүй. Яг л ДОХ, хавдарын эмчилгээ шиг үл мэдэгдэх өвчин шүү дээ. Гэтэл Эрүүл мэндийн яамнаас “Өчигдөр таван хүн эмчиллээ, 300 өвчтөн бүрэн эдгээлээ” гээд байх юм.
Ямар нэг нууц жор, эм тан байна уу гэсэн бодол төрнө. Энэ вирус Ухань хотод анх дэгдэхдээ хүн шууд унаад үхчихдэг хэмээн бичиж байсан. Ямар ч байсан шууд үхдэгээ болиод байгаагаас үзвэл коронавирус сульдаатай болсон юм даг уу. Тухайн үед манай уламжлалт ухааны эмч, маарамбууд эмчлэх арга бий, хурдан ороод ирээсэй гэх нь халаг байсан даа. Дэд сайд асан Ж.Амарсанаа гэгч “Би Ухань явмар байна. Хүн төрөлхтөнд тусламаар байна” хэмээн сүржигнэж байсан билээ.
Гэтэл одоо тоног төхөөрөмж гаднаас хямд үнээр оруулж ирэх зүйл яриад явах юм. Тэр сайхан мэдлэгээ одоо л гаргадаг цаг даа уг нь. Халдвар аван эмнэлэгт хэвтсэн нөхдөөс асуухад ганц нэг дусал залгадаг, өөр олигтой эмчилгээ хийдэггүй гэх мэдээлэл өгсөн байх юм. Ер нь тэгээд Дэлхийн Эрүүл мэндийн байгууллага өөрсдөө ч учраа олоогүй цар тахалд эмчилгээ заахгүй л дээ. Тэгэхээр эрүүл саруул болоод гарч байгаа нөхөд цаашид ямар ч асуудалгүй юу, манайхан бүрэн эдгээж чадаж байгаа юу гэдгийг яаж баттай мэдэх вэ.
Эрхэм эмч ямар эмчилгээгээр эдгээсэн гэдгээ зарлах болоогүй юу. Тэр эдгэсэн хүмүүсийн яриагаар бол коронавирусийг гэртээ ч эмчлэх бололцоотой юм биш шүү. Зарим нэг эрдэмтэн гэх нөхдүүд шинжилгээ авах төхөөрөмжийг хийж ядах юмгүй гэх. Тэгвэл хөдөөнийхөн цусны даралтыг бөгжөөр үздэг шиг тэр багажаар нь өөрсдөөсөө шинжилгээ аваад гэрээр эмчилж болох юм биш үү.
Эрүүл мэндийн яамны итгэл муутай яриа ийм таамаг хийхэд хүргэж байгаа юм. Түүнээс биш хүн төрөлхтөнд айдас авчирсан цар тахалд ам гарсангүй. Ямартаа ч эмчилж эдгээгээд байгаа нууцаасаа жаахан халаач дээ Т.Мөнхсайхан сайд аа. Эсвэл түр намдсан, далд үедээ шилжсэн үеийн “Эдгэсэн” гэж ойлгуулаад байгаа юм биш биз дээ. Зарим их мэдэгчид, намын троллууд “Коронавирусийг гэрээр эмчлэх бүрэн боломжтой байтал хөл хорио тогтоож Ерөнхийлөгчийн сонгуульд бэлдээд байна” гэх болжээ.
