“Тунгалаг тамир” кино дээр Луу гүний баян Итгэлт “Хоовон хөх үү айхтар дамшиг шүү. Цахиур Төмөрт зүүн аймгаас хурдан адуу олоод ирвэл олоод л ирнэ. Юу байх вэ” гэдэг дээ. Түүнтэй адилхан Ерөнхийлөгч асан Ц.Элбэгдорж “Тэр муу Коронавирусын вакциныг олоод ир гэвэл аваад ирнэ.
Танил тал ихтэй хүн хүн шүү би” гэж ханхалзсан билээ. Мөн УИХ-ын гишүүн асан Л. Эрдэнэчимэг “Англиас вакцин оруулаад ирэх боломж байна. Хамгийн хямдхан, хадгалах нөхцөл нь энгийн. Английн тал захиалгаа өг” гээд байх юм” гэсэн мессеж олон нийтэд хаялаа.
Эрхэм эх орончид маань “Эрүү өвдөг нь нийлсэн энэ авгай биднийг шулж ханаагүй байна” гээд дэвхцэж байх юм. Бас нөгөө “Ардын элч” кино дээр ноёнтон “Хар малаа чамд “Би тэр бичгийг хүргээд өгье” гэх ухаан байсангүй юу” гэдэг дээ. Түүнтэй адилхан энд тэндээс вакцин олоод ирье, ашиг хийе гэх эрхмүүд гарах юм шиг байна. Хүүхдийн сургуулийн автобуснаас хүртэл мөнгө унагаачихдаг эрхмүүд өвчин бол мөнгө хийх гарцаагүй боломж биш гэж үү. Эрх мэдэлд байсан эдгээр эрхмүүд худлаа хэлээгүй байх. Харин ч ийм боломж бололцоо байгааг олон нийтэд мэдээлж байгаа нь сайн хэрэг л дээ.
Тийм учраас төр засаг Ц.Элбэгдорж, Л.Эрдэнэчимэг гэлтгүй эдгээр боломжийг судлах ёстой. Л.Эрдэнэчимэг сайн санаад хэлсэн ч бай, ашиг бодоод ангайсан ч бай түүний хувилбарыг төр судлах үүрэгтэй юм. Энэ хоёрыг бизнес хийх гэлээ, хамтарч байна гэж тэнэгтэж байхын оронд “Ийм боломжууд” байгааг мэдээд авчихлаа шүү. Дэлхий дээр вакцин үйлдвэрлэгдэж боломжит худалдааг мэдлэг боловсрол, танил талаа ашиглан иргэд Монголчуудад санал болголоо. Юунд бухимдаад байгаа юм бэ. Хүчээр хийлгэх үү, үгүй юу гэдгээ иргэд өөрсдөө шийдэх боломж бүрдэх байлгүй дээ. Яг цагаа тулангуут маханд очерлодог шиг алалцах дээрээ тулахгүй л байгаасай даа.