Хятадууд Эрээний боомтыг хааж, манай наймаачид барааны хомсдолд орж, үгээ хэлж үсээ зулгааж байх шиг байна. Гэтэл ямар ч муу юманд сайн тал байдаг аж.
Урд хил хаагдсанаар Монголд нэг салбар үсрэнгүй хөгжиж байна! Манай иргэд дэлгүүр, гудамжны худалдааны лангуун дээр Монгол үйлдвэрийн оймснууд дүүрэн байгааг анзаарсан байх.
Тэгвэл Эрээний хил хаагдсанаар Монголын үндэсний оймс үйлдвэрлэл жинхэнэ утгаараа сэргэж байгаа юм байна. Үйлдвэрлэлээ нэмэгдүүлж, ажилчдынхаа тоог нэмээд эхэлжээ. Манай оймсны үйлдвэрийн үндсэн түүхий эд нь хонь, тэмээний ноос учир түүхий эдийн дутагдалд орно гэсэн асуудал байхгүй аж.
Манай үйлдвэрлэгчид хэлж байна. Хятадын оймсонд Монголын хил үүрд хаалттай баймаар байна гэж. Хэрэв Монголын оймс үйлдвэрлэгчид дотоодын хэрэгцээгээ бүрэн хангадаг болбол маш их ашиг олж, жинхэнэ капиталист хөрөнгөтөн, үйлдвэрийн эзэд төрөн гарахад бэлэн болжээ. Юун тэр Кола савлаж зардаг 3 үсэгтэй олигархууд. Тэд жижиг гарын наймаачид болно.
Юун тэр Эрээний хил хаахаар архиа хийж чаддаггүй компани. Юун тэр, харийн хоолны сүлжээ ажиллуулдаг 5 уултай компани. Оймс үйлдвэрлэгчид бүрэн хүчээрээ ажиллахад тэр этгээдүүд жижигдэхээр жинхэнэ баялаг бүтээгч хөрөнгөтнүүд төрөн гарна. Тэд цаашдаа үйлдвэрлэлээ өргөжүүлж олон улсад ч гарах боломжтой болжээ. Үндэсний үйлдвэрлэл бол Монголын хөгжлийн цорын ганц зөв зам гэдгийг Mонголчууд ч, төр нь ч хүлээн зөвшөөрөх цаг болсон.