ЭЦГ-ын Эдийн засгийн гэмт хэрэгтэй тэмцэх хэлтэс, АТГ-ынхан төмөр замын хэргийг сэргээн шалгахаар болжээ. Өөрөөр хэлбэл, та бидний сайн мэдэх, алдарт “Ухаахудаг-Гашуунсухайт”-ын чиглэлд тавигдах ёстой байсан 267 км төмөр замын ажлын хөрөнгийг овоолсон шороо болгон хувиргаж, албан тушаалаа хэтрүүлэн улсад онц их хэмжээний хохирол учруулсан гэх хэргээр Ерөнхийлөгч асан Х.Баттулга, Зам тээврийн сайд асан А.Гансүх нарын хүмүүст эрүүгийн хэрэг үүсгэн шалгаж байсан ч тэдний хэргийг 2017 оны 9 дүгээр сард Нийслэлийн прокурорын газраас хэрэгсэхгүй болгож байв.
Тухайлбал, хэрэг нь тусгаарлагдаж интерполоор эрэн сурвалжлагдаж байсан “МТЗ” ТӨХК-ийн дэд захирал асан П.Бат-Эрдэнэ, “Либерти партнерс”-ийн захирал Ч.Ганбат, ЗТЯ-ны ТНБД асан Б.Батзаяа нарт холбогдох хэргийг сэргээн шалгахаар болсон гэсэн үг.
Өөрөөр хэлбэл,төмөр замын дуулиан дэгдсэний дараа П.Бат-Эрдэнэ, Ч.Ганбат нар Монгол Улсаас оргон зайлж тэдэнд холбогдох хэргийг тусгаарлаж түр түдгэлзүүлээд байсан юм.
Олон нийтийн зүгээс Х.Баттулгыг Ерөнхийлөгч болсныхоо дараа өөрийнхөө болон тус хэрэгт холбоотой солонгос иргэдийг торгуулийн ялаар шийтгэж төмөр замын хэргийг дуусгавар болгосон хэмээн хардаж байгаа. Уг хэрэг дээр ажилласан мөрдөн байцаагч нар болон прокурорууд ч хэргийг хангалттай шалгасан, нотлох баримтыг сайтар цуглуулж, хөдөлшгүй баримтыг цуглуулсан ч хэргийг шалгахаас түдгэлзүүлж, торгохыг нь торгож хэргийг нь хаажээ.
Яг үнэндээ Ерөнхий сайд асан Н.Алтанхуягийн алдаатай бодлогын нэг бол Гашуунсухайт чиглэлд MCS-ийн барьж байсан төмөр замыг төрийн мэдэлд авсан явдал. Ингэснээр тус чиглэлийн төмөр замын бүтээн байгуулалт үлгэр болж үлдэх шалтгааны болсон бөгөөд хэрэв төмөр зам ашиглалтад орсон бол өдийд Монгол Улсын эдийн засаг ингэтлээ доройтож, ОУВС-ийн хөтөлбөрт хамрагдах ганцхан гарцтай үлдэхээргүй байсан тухай эдийн засагчид тайлбарлан хэлж байсан удаатай.
Тавантолгойгоос Гашуунсухайт хүртэлх 267 км төмөр замын ажил арав гаруй жил гацаж байгаа нь бодит үнэн. Тэгвэл энэ хэргийн учир зангилаа хэзээ тайлагдах бол. Тэр ч бүү хэл хуулийнхан хий хоосон хэргийн араас орж, бүтэн долоон жил гаруйн хугацаанд дээрх нэр бүхий хүмүүсийг хэлмэгдүүлсэн ял зэмд унах вий гэсэн болгоомжлол ч үүсээд байна.
Ямартай ч Ерөнхийлөгчийн албаа өгсөн Х.Баттулгын холбогддог энэхүү хэрэг олон жил дуншсаны эцэст ийнхүү эцэслэгдэхээр болжээ.
Эх сурвалж: Erennews.mn